2020-yilgacha Rossiyada strategik yadro arsenalining 100 foizi yangilanib bo‘ladi, deya xabar bermoqda “RIA Novosti” Rossiya bosh vaziri o‘rinbosari Dmitriy Rogozinga tayanib.
Uning aytishicha, strategik yadro kuchlarining texnik asoslarini shakllantirish ishlari “ilg‘or sur’atlarda” bormoqda. U shuningdek 2015-yilgacha armiya va flot ultrazamonaviy qurollar bilan 30 foiz darajada, 2020-yilgacha 70 foiz darajada to‘ldirilishini aytdi.
Bundan tashqari, Rogozin Rossiyada “har qanday xavf soluvchi harbiy harakatlar teatriga” osonlik bilan ko‘chirish mumkin bo‘lgan ixcham armiya tuzish ahamiyatini ta’kidladi.
“O‘z hamkasblarimizni hayratga solishimiz va buning uchun turli qurollarni ularga ko‘z-ko‘z qilishimiz kerakmikin? Nimanidir o‘zimiz uchun, maxfiy saqlab, eng mushkul vaziyatda kutilmaganda namoyish etishimiz kerak”, — dedi bosh vazir o‘rinbosari.
Nashrning eslatishicha, 2008-yilda Rossiyada Qurolli kuchlarni isloh qilish boshlangan, 2011-yilda esa Rossiyani qayta qurollantirish dasturi joriy etilgan. 2020-yilgacha unga 20 trillion rubl sarflash rejalashtirilmoqda.
Izoh (0)