Rossiyadagi asosiy milliy bolalar ko‘rsatuvi bo‘lgan “Spokoynoy nochi, malishi!” (“Xayrli tun, kichkintoylar!”)da yangi qahramon — yo‘lbars paydo bo‘ldi, deya xabar bermoqda “RIA Novosti”. Bu haqda dasturni chiqaradigan “Klass!” telekompaniyasi direktorlar kengashi raisi Aleksandr Mitroshenkov e’lon qildi.
“Bizda yangi qahramon bo‘yicha ko‘plab g‘oyalar bor edi. Ular orasida bo‘ri, maymun, jirafa va hatto ot ham bor edi”, — dedi Mitroshenkov Moskvada bo‘lib o‘tgan matbuot anjumanida.
“Marhamat, yangi qahramonimizning prototipi bilan tanishing”, — deya qo‘shimcha qildi u tirik yo‘lbars bolasini ommaga tanishtirar ekan.
Eslatib o‘tamiz, avvalroq Mitroshenkov dastur yaratuvchilari ko‘rsatuvning 50 yilligiga “syurpriz” sifatida yangi qahramon ustida ishlayotganini ma’lum qilgan edi. U yangi qahramon 3D formatda — haqiqiy kompyuter qahramoni bo‘lishini, tabassum qilish, qo‘l berib ko‘rishish va gaplasha olish qobiliyatlariga ega bo‘lishini aytib o‘tgan edi.
Mazkur g‘oya esa Rossiya Federatsiyasi Prezidenti Vladimir Putinga tegishlidir.
“Anchadan beri ko‘rsatuv uchun yangi qo‘g‘irchoq-qahramon izlayotgan edik. Biz juda ko‘p variantlarni ko‘rib chiqdik. Biroq, rostini aytsam, yangi qahramon g‘oyasi prezident tomonidan ilgari surildi. Avvaliga bu kutilmagan taklif haqida o‘ylab qoldik, birozdan so‘ng, uning mo‘ljalga aniq tekkanini tushunib yetdik”, — degan edi “Klass!” telekompaniyasi direktorlar kengashi rahbari Aleksandr Mitroshenkov.
Izoh (0)