21-sentabr, yakshanba kuni 300 mingdan ortiq kishi Nyu-York ko‘chalarida iqlim o‘zgarishlari muammosiga e’tibor qaratish maqsadida namoyish uyushtirdi, deya xabar bermoqda “ITAR-TASS”.
“Xalq iqlim marshi”da siyosatchilar, olimlar, turli ekologik va kasaba uyushmalari tashkilotlari vakillari, talabalar, diniy yetakchilar, shuningdek ko‘plab taniqli kishilar, jumladan britaniyalik rok musiqachi Sting, Gollivud aktyorlari Mark Ruffalo va yaqinda BMTning iqlim o‘zgarishlari masalalari bo‘yicha tinchlik elchisi etib tayinlangan Leonardo Di Kaprio qatnashdi.
Namoyishga BMT bosh kotibi Pan Gi Mun ham qo‘shildi. U “Men iqlim o‘zgarishiga qarshi kurash tarafdoriman” yozuvi tushirilgan futbolka kiyib olib, taniqli primatolog (maymunshunos) Jeyn Gudoll va Fransiya ekologiya vaziri Segolan Ruayal hamrohligida marsh qildi.
“Iqlim marshi” 23-sentabr kuni Nyu-Yorkda BMT Bosh Assambleyasining navbatdagi sessiyasi doirasida bo‘lib o‘tadigan iqlim bo‘yicha sammit arafasida o‘tkazildi. Unda 120 davlat va hukumat rahbarlari issiqxona gazlarini ajratib chiqarishni kamaytirish to‘g‘risidagi umumiy bitimni muhokama qilishadi, u 2015-yil oxirida Parijda imzolanishi kerak.
Izoh (0)