2020 йилгача Россияда стратегик ядро арсеналининг 100 фоизи янгиланиб бўлади, дея хабар бермоқда «РИА Новости» Россия бош вазири ўринбосари Дмитрий Рогозинга таяниб.
Унинг айтишича, стратегик ядро кучларининг техник асосларини шакллантириш ишлари «илғор суръатларда» бормоқда. У шунингдек 2015 йилгача армия ва флот ультразамонавий қуроллар билан 30 фоиз даражада, 2020 йилгача 70 фоиз даражада тўлдирилишини айтди.
Бундан ташқари, Рогозин Россияда «ҳар қандай хавф солувчи ҳарбий ҳаракатлар театрига» осонлик билан кўчириш мумкин бўлган ихчам армия тузиш аҳамиятини таъкидлади.
«Ўз ҳамкасбларимизни ҳайратга солишимиз ва бунинг учун турли қуролларни уларга кўз-кўз қилишимиз керакмикин? Ниманидир ўзимиз учун, махфий сақлаб, энг мушкул вазиятда кутилмаганда намойиш этишимиз керак», — деди бош вазир ўринбосари.
Нашрнинг эслатишича, 2008 йилда Россияда Қуролли кучларни ислоҳ қилиш бошланган, 2011 йилда эса Россияни қайта қуроллантириш дастури жорий этилган. 2020 йилгача унга 20 триллион рубль сарфлаш режалаштирилмоқда.
Изоҳ (0)