Syerra-Leonedagi milliy karantin davomida Ebola virusi tufayli vafot etgan 92 kishining jasadi topildi. Korrespondent.net Reutersga tayanib yozishicha, kasallikni yuqtirgan yana 56 kishi aniqlangan.
Karantin chog‘ida 30 ming nafar ko‘ngillilar aholiga virusni yuqtirmaslik yo‘llarini tushuntirib, gigiyenani ta’minlash uchun 1,5 millionta sovun tarqatdi. Reuters manbasi bergan ma’lumotga ko‘ra, karantin uzaytirilishi mumkin.
Kasallikni yuqtirmaslikning asosiy qoidalaridan biri bemorlar va vafot etganlarga tegmaslikdir. Diniy an’analar jasadni yuvishni ko‘zda tutadi, shu tufayli ko‘pchilik aholi maxsus dafn jamoasini chaqirishdan avval bu ishni amalga oshiradi, natijada virusni yuqtirib oladi.
Ebola virusi tufayli yuzaga keladigan kasallik epidemiyasi G‘arbiy Afrikada 2,6 mingdan ziyod kishini hayotdan olib ketdi, yana 5 mingdan ortiq kishi u bilan kasallandi. Kasallanish va o‘lim holatlarining deyarli barchasi Liberiya, Syerra-Leone va Gvineyadan iborat uch davlatga to‘g‘ri keladi.
Eslatib o‘tamiz, Syerra-Leone davlatida 18—21-sentabr kunlari to‘rt kunlik umummilliy karantin e’lon qilindi. Bu vaqt davomida odamlarga kuchli zarurat tug‘ilmasa, uydan tashqariga chiqmaslik tavsiya etildi.
Izoh (0)