AQSh maxfiy xizmatida 19-sentabr, juma kuni Oq uyda bo‘lib o‘tgan hodisa yuzasidan ichki tekshirish ishlari boshlandi, deya xabar berdi “ITAR-TASS” Amerika OAVlariga tayanib.
O‘sha kuni AQSh prezidenti qarorgohi hududiga noma’lum erkak noqonuniy ravishda kirib, majmuaning asosiy eshigigacha chopib borishga muvaffaq bo‘lgan. Shundagina u qurollangan soqchilar tomonidan ushlab olingan.
Hodisa yuzasidan izoh berar ekan, AQShdagi muhim shaxslar va yuqori lavozimdagi xorijiy mehmonlarga soqchilik qilish bilan shug‘ullanadigan Maxfiy xizmat vakili qonunbuzar qo‘lga olingan joyni “nomaqbul” deb atadi va bu borada tekshirish olib borilishini tasdiqladi.
AQSh Kongressi vakillar palatasi nazorat va hukumat islohoti qo‘mitasining milliy xavfsizlik masalalari bo‘yicha kichik qo‘mitasi raisi Jeyson Chaffets ham vaziyatni shunga o‘xshash fikr bilan izohladi. U voqea joyida bo‘lgan Maxfiy xizmat xodimlari xatti-harakatlarini “butunlay nomaqbul” deb atadi. “Afsuski, ular o‘z ishlarini bajara olmayapti. Maxfiy xizmat rahbariyati ko‘plab savollarga javob berishi kerak bo‘ladi”, — dedi u.
Izoh (0)