Tojikiston militsiyasi o‘smirlarga zo‘ravonlik o‘tkazishda ayblanmoqda

Qonunbuzarlik uchun militsiyaga tushadigan tojikistonlik bolalar va o‘smirlar u yoki bu shaklda zo‘ravonlikka uchraydi. Bu haqda “Xalqaro qamoqxona islohoti” (RPI) nohukumat tashkilotining Tojikiston Respublikasi ombudsmani hamkorligida o‘tkazgan tadqiqotlari darak bermoqda, deb yozadi BBC.

Olingan ma’lumotlarga ko‘ra, huquqni muhofaza qilish organlari xodimlari voyaga yetmaganlardan tan oluvchi ko‘rsatmalar olish uchun haqorat va jismoniy zo‘ravonlikdan foydalanadi.

Shuningdek, ma’ruzada aytilishicha, bunday qonunbuzarliklar statistikasi olib borilmaydi, shunday holatlar bilan bog‘liq jinoiy ishlar hafsalasizlik bilan tergov qilinadi. Zo‘ravonlik qurbonlari esa qasos olishlari va jazolashlaridan qo‘rqib, huquqni muhofaza qilish organlariga murojaat qilmaydi.

Tadqiqot natijalariga ko‘ra, so‘rovda qatnashgan bolalarning 38 foizi ularni militsiyada bir sutkadan ko‘proq vaqt ushlab turishganini aytgan, bu qonunga ziddir. Ularning 20 foizi kattalar bilan bitta kamerada saqlangan.

Hibsga olingan bolalar va o‘smirlarning 37 foizigagina yuridik yordam taklif etilgan.

Xalqaro qamoqxona islohoti loyihasining mintaqaviy muvofiqlashtiruvchisi Azamat Shambilovning aytishicha, hibsdagi bolalarga nisbatan zo‘ravonlik ko‘pincha ular militsiyaga keltirilgan paytda yuz beradi. “O‘sha vaqtda ularning yonida advokat yoki ota-onalari bo‘lmasligi ham mumkin. U yerda nimalar sodir bo‘lishi noma’lum”, — dedi u.

Tojikiston hukumati mamlakatda bunday muammolar borligini yashirmaydi. Ba’zi amaldorlar fikricha, bu, avvalo, bolalar va o‘smirlar o‘rtasida jinoyatchilik darajasi oshib ketgani bilan bog‘liq.

“Bolalar orasida tajovuzkorlik ruhining oshishiga mamlakatdagi ijtimoiy-iqtisodiy vaziyat, migratsiya hamda internet sabab bo‘lmoqda”, — dedi qonunchilik va inson huquqlari bo‘yicha parlament qo‘mitasi raisi Mahmadali Vatanov.

“Bolalarni qonunni buzishga nima majbur qilayotgani haqidagi savol muhim ekanligi shubhasiz, — dedi siyosatshunos Ravshan Melikov. — Biroq bu yerda gap ularning militsiyaga tushganida qanday munosabatga uchrayotgani haqida bormoqda”.