АҚШ махфий хизматида 19 сентябрь, жума куни Оқ уйда бўлиб ўтган ҳодиса юзасидан ички текшириш ишлари бошланди, дея хабар берди ИТАР-ТАСС Америка ОАВларига таяниб.
Ўша куни АҚШ президенти қароргоҳи ҳудудига номаълум эркак ноқонуний равишда кириб, мажмуанинг асосий эшигигача чопиб боришга муваффақ бўлган. Шундагина у қуролланган соқчилар томонидан ушлаб олинган.
Ҳодиса юзасидан изоҳ берар экан, АҚШдаги муҳим шахслар ва юқори лавозимдаги хорижий меҳмонларга соқчилик қилиш билан шуғулланадиган Махфий хизмат вакили қонунбузар қўлга олинган жойни «номақбул» деб атади ва бу борада текшириш олиб борилишини тасдиқлади.
АҚШ Конгресси вакиллар палатаси назорат ва ҳукумат ислоҳоти қўмитасининг миллий хавфсизлик масалалари бўйича кичик қўмитаси раиси Жейсон Чаффетс ҳам вазиятни шунга ўхшаш фикр билан изоҳлади. У воқеа жойида бўлган Махфий хизмат ходимлари хатти-ҳаракатларини «бутунлай номақбул» деб атади. «Афсуски, улар ўз ишларини бажара олмаяпти. Махфий хизмат раҳбарияти кўплаб саволларга жавоб бериши керак бўлади», — деди у.
Изоҳ (0)