AQSh Ukrainaga NATOdan tashqaridagi alohida ittifoqdosh maqomini berishdan bosh tortdi

AQSh Ukrainaga NATO tarkibiga kirmaydigan alohida ittifoqdosh maqomini taqdim etmaydi. Bu haqda Ukraina prezidenti Pyotr Poroshenko CNN’ga bergan intervyusida ma’lum qildi, deb yozadi “Segodnya”.

Telekanal jurnalistining AQSh prezidenti Ukrainaga bunday maxsus maqom berishdan bosh tortgani haqida bergan savoliga javoban, Poroshenko Obamaning haqiqatan ham “yo‘q” deb javob bergani, biroq bunga AQSh va Ukraina o‘rtasida allaqachon hamkorlik darajasidagi alohida maqom borligini sabab qilib ko‘rsatganini aytdi. Uning so‘zlariga ko‘ra, Obama “xavfsizlik va mudofaa sohasidagi hamkorlik NATO a’zosi bo‘lmagan sherik maqomidan ancha yuqori”ligini ta’kidlagan.

Poroshenko Ukrainaning xavfsizlik va mudofaa bo‘yicha AQSh strategik sherigi maqomida ekanligini aytib o‘tdi. “Biz so‘raganimizdan ham ko‘ra ko‘prog‘iga erishdik”, — dedi u.

Eslatib o‘tamiz, 18-sentabr, payshanba kuni Ukraina prezidenti AQShga xizmat tashrifi bilan bordi. U Vashingtonda AQSh Kongressi sessiyasida nutq so‘zladi, AQSh vitse-prezidenti Jo Bayden va prezident Obama bilan uchrashdi.