8-sentabr kuni Jahon banki va Orolni qutqarish xalqaro jamg‘armasining Ijroiya qo‘mitasi Hamjihatlik to‘g‘risida memorandum imzoladi, deya xabar bermoqda Jahon banki sayti. Ushbu hujjat ularning Markaziy Osiyodagi suv manbalari, ijtimoiy-iqtisodiy va ekologik vaziyatni boshqarishni yaxshilash sohasidagi hamkorligini mustahkamlaydi.
Memorandum Orolni qutqarish xalqaro jamg‘armasining ta’sischi davlatlari (Qozog‘iston, Qirg‘iziston, Tojikiston, Turkmaniston, O‘zbekiston)ga uchinchi Orol dengizi havzasi dasturi doirasida qator tadbirlar ishlab chiqishda hamkorlik qilishni nazarda tutadi.
“Bugun imzolangan Memorandum Jahon banki va Orolni qutqarish xalqaro jamg‘armasi o‘rtasidagi hamkorlikni yangi darajaga ko‘taradi. Biz birgalikda hayotlari Amudaryo va Sirdaryoga bog‘liq millionlab kishilarning farovonligini ta’minlab beruvchi qator muhim tadbirlarni belgilab olish majburiyatini o‘z bo‘ynimizga oldik”, — dedi Jahon bankining Markaziy Osiyo mintaqasi bo‘yicha direktori Saroj Kumar Ja.
Jahon banki va Orolni qutqarish xalqaro jamg‘armasining Ijroiya qo‘mitasi potensial mintaqaviy va milliy investitsiya loyihalarini va texnik hamkorlikni aniqlashda birgalikda ish olib boradi. Ushbu loyihalar mintaqaviy darajada ma’lumotlar almashunuvi va suv manbalaridan samaraliroq foydalanish, ularni boshqarish, to‘g‘onlar xavfsizligini oshirish va tabiiy ofatlar risklarini yumshatish bo‘yicha axborot tizimini ishlab chiqishga yo‘naltirilishi mumkin.
Izoh (0)