CNN Ukrainada mingga yaqin Rossiya askarlari jang qilayotgani haqida xabar berdi

Amerika hukumati Moskva tomonidan rad qilinayotgan bo‘lsa-da, Rossiya qo‘shinlari Ukraina janubi-sharqidagi jangovar harakatlarda bevosita ishtirok etgani haqidagi ma’lumotni tasdiqlamoqda. Bu haqda AQSh hukumatidagi rasmiy shaxslarga tayanib CNN telekanali xabar berdi.

Amerika razvedkasi tomonidan olingan so‘nggi ma’lumotlar janubiy Ukraina hududiga ming nafargacha Rossiya harbiylari kirib, nizolarda qatnashayotganini ko‘rsatgan.

“Ming nafar — bu ancha bosiq holda berilgan baho, — deya Amerika razvedkasi ma’lumotlarini izohladi NATO ofitseri. — Ularning ortida juda ko‘plab Rossiya kuchlari turibdi”.

Korrespondent.net yozishicha, avvalroq Ukraina Milliy xavfsizlik va mudofaa xizmati Rossiya qo‘shinlarining Donetsk viloyati janubidagi qator aholi punktlarini bosib olganini xabar qilgan edi. Shu munosabat bilan Ukraina prezidenti Turkiyaga tashrifini bekor qildi va BMT Xavfsizlik Kengashining favqulodda majlisi haqida e’lon qildi.

O‘z navbatida, Rossiyaning Yevropada xavfsizlik va hamkorlik tashkilotidagi vakili Andrey Kelin Ukrainada hech qanday Rossiya qo‘shinlari va harbiy texnikalari yo‘qligini ma’lum qildi.