Muhammad Osloda eng ommabop erkaklar ismiga aylandi

Norvegiya poytaxti Osloda eng ommabop erkaklar ismi Muhammad bo‘ldi. Bu shahar tarixida birinchi marta sodir bo‘ldi, deya xabar berdi The Local.

Mutaxassislar hisob-kitobiga ko‘ra, 4,8 ming nafar yigit payg‘ambar ismiga ega. Ikkinchi o‘rinni Yan (4,7 ming), uchinchi o‘rinni Per (4,1 ming) ismlari egalladi.

Nashrning ta’kidlashicha, Muhammad Osloda ketma-ket to‘rt yil eng ko‘p tarqalgan bolalar ismi bo‘lgan. Biroq Norvegiya poytaxtidagi barcha erkaklar ismlari o‘rtasida u birinchi marta endi yetakchilik qildi.

So‘nggi bir necha yillar ichida Muhammad ismi Angliya va Uels, shuningdek Amsterdam, Gaaga, Rotterdam, Utrext, Bryussel kabi shaharlar tug‘ruqxonalarida eng ko‘p yangradi. Milanda esa bu ism nafaqat yangi tug‘ilgan chaqaloqlar, balki biznesmenlar orasida ham eng ommabopi bo‘ldi. Shahar savdo palatasi hisob-kitoblari bo‘yicha 1,6 mingga yaqin milanlik tadbirkorlarning ismi Muhammaddir.