Janubiy Koreya hukumati Pxenyan o‘zining yadro bilan bog‘liq rejalaridan voz kechsa, KXDRga xalqaro investitsiyalarni jalb etishda yordam berishi mumkin. Bu haqda Respublika bosh vazirining iqtisodiy masalalar bo‘yicha birinchi o‘rinbosari Choy Gyon Xvanga asoslanib, Renxap agentligi xabar berdi.
“Agar Shimoliy Koreya o‘z yadro qurolini yaratishdan voz kechishga qaror qilsa, biz KXDRning xalqaro moliya tashkilotlari bilan hamkorlik qilib, xalqaro investitsiyalarga ega bo‘lishida yordam berish uchun Shimoli-Sharqiy Osiyo mamlakatlari bilan hamkorlik qilishga tayyormiz”, — dedi Choy Gyon Xvan.
Bundan tashqari, bosh vazir o‘rinbosari mintaqadagi boshqa qo‘shni mamlakatlar bilan hamkorlikda, KXDRga mamlakatning nochor fuqarolarini qo‘llab-quvvatlash uchun zarur infratuzilmani shakllantirishga ko‘maklashuvchi Shimoli-Sharqiy Osiyo mamlakatlari taraqqiyot bankini tuzishga ham va’da berdi.
2005-yilning 10-fevralida KXDR ilk marta o‘zining yadro quroliga ega ekanligini tan olgan. KXDR o‘zining dastlabki yerosti yadro sinovlarini 2006-yilning 9-oktabr kuni amalga oshirgan. O‘sha vaqtda KXDR qo‘llagan yadro qurolining quvvati 5 dan 15 kilotonnagacha yetgan.
2005—2013-yillarda KXDR hukumati o‘tkazgan yerosti yadro sinovlari dunyo hamjamiyatining e’tiroziga sabab bo‘lgan. Bunga javoban BMT Xavfsizlik Kengashi KXDRdan yadro sohasidagi faolligini to‘xtatishni talab qiluvchi bir qator qarorlarni qabul qilgan edi. Biroq shunga qaramasdan, 2013-yildagi ma’lumotlarga ko‘ra, KXDRning raketa va yadro dasturlariga ajratgan mablag‘i 3,24 milliard dollardan oshgan.
Izoh (0)