Ichki ishlar vazirligida O‘zbekistonda jinoyatchilikka qarshi kurashish, kriminogen vaziyatni barqarorlashtirish hamda shaxsga doir maʼlumotlarni himoya qilish masalalarini takomillashtirishga qaratilgan vazifalarning ijrosi yuzasidan tezkor yig‘ilish o‘tkazildi. Bu haqda IIV matbuot xizmati xabar berdi.
Yig‘ilishda tashkiliy masalalar ko‘rildi. Prezident qarori bilan, Andijon viloyati IIB boshlig‘i lavozimini egallab kelgan polkovnik Ayubxon Rahmatullayev ichki ishlar vazirining birinchi o‘rinbosari lavozimiga tayinlandi.
Tadbirda shuningdek, shaxsga doir maʼlumotlar to‘g‘risidagi qonunchilik talablaridan kelib chiqib, ularni himoya qilish yo‘nalishini takomillashtirish masalalariga eʼtibor qaratildi. Prezident farmoyishi bilan Ichki ishlar vazirligi huzuridagi Migratsiya va personallashtirish departamenti rahbari lavozimiga polkovnik Ulug‘bek Toshxo‘jayev tayinlandi.
Kun tartibidagi masalalar bo‘yicha soha masʼullarining taklif va mulohazalari tinglanib, yangi tayinlangan rahbarlarga tegishli topshiriqlar berildi.
Izoh (0)