Ichki ishlar vazirining tegishli buyrug‘i bilan IIV Tezkor qidiruv departamenti Jinoyat qidiruv xizmati boshlig‘i — polkovnik Axrorjon Atxamov lavozimidan ozod etildi. Bu haqda IIV matbuot xizmati xabar berdi.
Shuningdek, Toshkent shahar IIBB boshlig‘ining birinchi o‘rinbosari polkovnik Doniyor Toshxo‘jayev ham ishdan olindi.
Bundan tashqari, Toshkent shahar IIBB boshlig‘ining tegishli buyrug‘i bilan IIBB Tezkor qidiruv xizmati Jinoyat qidiruv boshqarmasi Uyushgan jinoyatchilikka qarshi kurashish bo‘limi boshlig‘i — podpolkovnik Timur Sobirov lavozimidan ozod etildi.
2023-yilning avgust oyida Doniyor Toshxo‘jayev Toshkent shahar IIBBga qaytgan edi.
U 2022-yil fevral oyidan 2023-yil avgustigacha Toshkent viloyati IIB Tergov boshqarmasi boshlig‘i o‘rinbosari lavozimida ishlab kelgan.
Avvalroq, Abdusalom Azizov DXX raisligidan bo‘shatilgani rasman tasdiqlangandi. U Xavfsizlik kengashi kotibiyati kadrlar ixtiyoriga o‘tkazildi.
Bundan tashqari, O‘zbekiston prezidentining tegishli farmonlari bilan:
- Bahodir Qurbonov mudofaa vaziri lavozimidan ozod etildi va Davlat xavfsizlik xizmati raisi lavozimiga tayinlandi;
- Shuhrat Xolmuhamedov mudofaa vazirining birinchi o‘rinbosari – Qurolli kuchlar Bosh shtabi boshlig‘i lavozimidan ozod etildi va mudofaa vaziri lavozimiga tayinlandi.
Izoh (0)