Ichki ishlar vaziri general-leytenant Po‘lat Bobojonov tomonidan O‘zbekiston prezidentining huquqni muhofaza qiluvchi va nazorat organlari faoliyatini muvofiqlashtirish masalalari bo‘yicha maslahatchisi Doniyor Qodirov ishtirokida ichki ishlar organlari faoliyatiga oid tezkor yig‘ilish o‘tkazildi. Bu haqda IIV axborot xizmati xabar berdi.
Yig‘ilishda davlat rahbari raisligida 12-yanvar kuni Xavfsizlik kengashining Qurolli Kuchlar va harbiy-maʼmuriy sektorlarning 2023-yildagi faoliyati yakunlari va yaqin istiqbolga mo‘ljallangan vazifalar muhokamasiga bag‘ishlangan kengaytirilgan majlisida belgilangan vazifalar hamda qo‘yilgan topshiriqlarning ijrosiga qaratilgan masalalar ko‘rib chiqilgan.
Shuningdek, tadbir jarayonida tashkiliy masala ko‘rilgan. O‘zbekiston prezidentining qarori bilan Ramazon Ashrapov ichki ishlar vazirining o‘rinbosari – Tergov departamenti boshlig‘i lavozimiga tayinlangani eʼlon qilingan.
Majlisda tergov va ekspert-kriminalistika sohasiga oid faoliyatni tanqidiy ko‘rib chiqish, tergovchi va ekspertlarning malakasini oshirish, yangi tuzilgan Kriminologiya tadqiqot instituti bilan hamkorlikda tizimni innovatsion va ilmiy yondashuvlar asosida yanada takomillashtirish, axborot almashinuvi va qarorlar qabul qilish bo‘yicha zamonaviy huquqiy va ilmiy ishlanmalarni amalga keng joriy etish, sohada axborot xavfsizligi va kiberxavfsizlikni taʼminlash bo‘yicha tegishli topshiriqlar berilgan.
Eslatib o‘tamiz, yanvar oyida ichki ishlar vaziri o‘rinbosari — Tergov departamenti rahbari lavozimida ishlab kelgan Yahyo Abdulhaqov lavozimdan ozod etilgandi. U 2021-yil fevralidan buyon vazir o‘rinbosari edi, u endi boshqa ishga o‘tayotgani aytilgan.
Izoh (0)