Tor doirada va rasmiy delegatsiyalar ishtirokidagi muzokaralardan so‘ng O‘zbekiston va Pokiston o‘rtasida ikki tomonlama bitimlarning salmoqli to‘plami imzolandi.
Prezident matbuot xizmatining ma’lum qilishicha, Shavkat Mirziyoyev va Pokiston bosh vaziri Shahboz Sharif ko‘p qirrali O‘zbekiston—Pokiston hamkorligini yanada rivojlantirish va mustahkamlashga qaratilgan qo‘shma deklaratsiya hamda ikki tomonlama Oliy darajadagi strategik sheriklik kengashini tuzish to‘g‘risidagi bayonnomani imzoladi.
Ikki mamlakat yetakchilari huzurida tashrif davomida imzolangan quyidagi hujjatlar almashildi:
- Fan, texnika va innovatsiyalar sohasidagi hamkorlik to‘g‘risida bitim;
- Diplomatik pasport egalarining vizasiz safarlari to‘g‘risida bitim;
- Ichki ishlar vazirliklari o‘rtasidagi hamkorlik to‘g‘risida bitim;
- Professional taʼlim sohasidagi hamkorlik to‘g‘risida bitim;
- Yoshlarga oid siyosat sohasidagi hamkorlik to‘g‘risida bitim;
- Milliy axborot agentliklari o‘rtasidagi hamkorlik to‘g‘risida bitim;
- diplomatik akademiyalar, Toshkent va Lahor shaharlari o‘rtasidagi hamkorlik to‘g‘risidagi bitimlar va ahdlashuvlar hamda boshqa hujjatlar.
Hujjatlar imzolanishidan lavhalar
-NKBG19Hb.jpg)
Pokiston bosh vazirining O‘zbekistonga rasmiy tashrifi
Pokiston bosh vaziri Shahboz Sharif Shavkat Mirziyoyevning taklifiga binoan 25-fevral kuni rasmiy tashrif bilan O‘zbekistonga kelgandi. Uni Toshkent xalqaro aeroportida bosh vazir Abdulla Aripov va boshqa rasmiylar kutib oldi. Qisqa suhbatdan so‘ng Shahboz Sharif Abdulla Aripov hamrohligida “Yangi O‘zbekiston” bog‘iga bordi va Mustaqillik monumenti poyiga gul qo‘ydi. 26-fevral kuni Toshkent shahridagi Xalqaro kongress markazida Pokiston bosh vaziri rasmiy kutib olishga bag‘ishlangan tantanali marosim bo‘lib o‘tdi. So‘ng Shavkat Mirziyoyev va Pokiston bosh vaziri tor doirada va rasmiy delegatsiyalar ishtirokida muzokaralar o‘tkazdi.
Izoh (0)