Abxaziya parlamenti binosida uch nafar deputat o‘rtasidagi mojaroda otishma sodir bo‘ldi. Jarohatlangan ikki nafar parlament a’zosi — Kan Kvarchiya va Vaxtang Golandziya kasalxonaga yotqizildi. Mamlakat Sog‘liqni saqlash vazirligi Golandziya olgan tan jarohati oqibatida vafot etganini ma’lum qildi.
“Janjal deputatlar Adgur Xaraziya, Kan Kvarchiya va Vaxtang Godandziya o‘rtasida sodir bo‘ldi. Xaraziya bir necha marta o‘q uzib, Kvarchiya va Godandziyani yarador qildi”, deya Abxaziya Ichki ishlar vazirligi ma’lum qildi.
“TASS” axborotiga ko‘ra, otishma yopiq majlis paytida yuz bergan.
“Deputat Adgur Xaraziya voqea joyidan qochib ketgan”, deb xabar berdi Abxaziya ichki ishlar vaziri vazifasini bajaruvchi Robert Kiut.
Yelkasidan yaralangan Kan Kvarchiya reanimatsiyada, ammo uning hayotiga xavf yo‘qligi aytildi. Parlament binosida IIV va prokuratura tergov guruhlari faoliyat yuritmoqda.
Abxaziya prezidenti vazifasini bajaruvchi Badra Gunba sodir bo‘lgan voqea yuzasidan kuch ishlatish tuzilmalarining axboroti bilan tanishib chiqdi. Yig‘ilish ishtirokchilari hodisa bo‘yicha tergov boshlangani haqida ma’lumot berdilar. Mahalliy OAVga ko‘ra, parlament yig‘ilishida konchilikni taqiqlash to‘g‘risidagi qonun loyihasi muhokama qilinayotganda Xaraziya va Kvarchiya o‘rtasida bahs-munozara boshlangan, Golandziya esa ularni ajratishga uringan.
Izoh (0)