Qashqadaryo viloyatidagi Shahrisabz aeroporti 26-mart kuni faoliyatini tikladi, deb xabar bermoqda Uzbekistan Airports matbuot xizmati.
Aeroporti ikki haftalik tanaffusdan so‘ng muntazam yo‘lovchi qatnovlarini qabul qilishni boshladi. Aeroport uchish-qo‘nish yo‘lagida kapital ta’mirlash ishlari olib borilishi sabab 13-martdan boshlab vaqtinchalik yopilgandi.
Tanlov natijalariga ko‘ra, qurilish-ta’mirlash ishlarini “Farg‘ona yo‘llardan muntazam foydalanish korxonasi” olib bordi.
Xabarda aytilishicha, uzoq muddatli foydalanishdan keyin uchish-qo‘nish yo‘lagi sirti mustahkamlanib, yangi asfalt bilan almashtirildi. Yurish yo‘lagini ta’mirlash ham yaqin vaqt ichida yakunlanadi.
Shu paytgacha Shahrisabz aeroportida samolyotlarni qabul qilish imkoniyati cheklangan edi — parvozlar haftasiga ikki marta kichik L-410 samolyotlarida amalga oshirilardi. Uchish-qo‘nish yo‘lagi ta’mirlangandan so‘ng aeroport o‘rta masofaga mo‘ljallangan zamonaviy ATR-72 samolyotlarini haftasiga uch martagacha qabul qilish imkoniyatiga ega bo‘ldi.
Shavkat Mirziyoyev 2023-yilning oktyabrida o‘tgan yig‘ilishda Shahrisabz aeroportida yangi ATR samolyoti parvozlari yo‘lga qo‘yilib, Samarqand, Buxoro, Xorazm va vodiy viloyatlariga mahalliy reyslar ko‘paytirilishini aytgandi.
Izoh (0)