Andijon aeroporti 20-martdan muntazam yo‘lovchi qatnovlarini qabul qila boshlaydi, deb xabar bermoqda Uzbekistan Airports matbuot xizmati.
Birinchi reys Toshkent—Andijon—Toshkent yo‘nalishi bo‘yicha amalga oshiriladi.
Andijon xalqaro aeroporti 2023-yilning 1-aprelidan boshlab aerodrom qoplamasi rekonstruksiya qilinishi tufayli aviaparvozlar uchun vaqtincha yopilgandi. Aeroportning mavjud uchish-qo‘nish yo‘lagi uzunligi 2985 metr va eni 44 metr bo‘lib, yo‘l qoplamasining yuk ko‘tarish qobiliyati pastligi, shuningdek, zamonaviy yoritish tizimining yo‘qligi sababli ko‘plab turdagi samolyotlarni qabul qilishda va tunda faoliyat olib borishda cheklovlar mavjud edi.
2025-yil 15-mart kuni ushbu aeroport rekonstruksiyasining birinchi bosqichi yakunlandi. Uning doirasida aerodrom majmuasining salmoqli qismi, jumladan, uzunligi 3300 metr va kengligi 60 metr bo‘lgan yangi 4E toifali uchish-qo‘nish yo‘lagi, yurish yo‘lagi va 3 ta samolyotlar to‘xtash joyi bo‘lgan perron qurilishi yakunlandi. Terminal binosi esa, hozirgi holatida qolmoqda. Terminal qismidagi ishlar rekonstruksiyaning ikkinchi bosqichida amalga oshirilishi ko‘zda tutilgan.
Kelgusida Andijon aeroportiga xalqaro reyslarni qayta yo‘lga qo‘yish ham rejalashtirilgan.
Izoh (0)