Isroil hujumi tufayli 2024-yil sentyabrda halok bo‘lgan “Hizbulloh” rahbari Hasan Nasrulloh 23-fevralda dafn etiladi. Bu haqda “Hizbulloh”ning amaldagi yetakchisi Naim Qosim ma’lum qildi.
Nasrulloh guruhni 30 yildan ortiq boshqargan va 27-sentyabrda Bayrutda Isroilning bir qator hujumlari paytida o‘ldirilgan. Murakkab vaziyat tufayli o‘shanda dafn marosimi vaqtinchalik o‘tkazilgan. Endilikda “Hizbulloh” ommaviy “tantanali dafn marosimi” o‘tkazilishini e’lon qildi.
Marosimda Nasrulloh o‘limidan bir hafta o‘tgach halok bo‘lgan “Hizbulloh”ning yuqori lavozimdagi qo‘mondoni Hoshim Safiiddin ham qayta dafn etiladi. Qosim birinchi marta Safiiddin “Hizbulloh”ning yangi bosh kotib etib saylangani, biroq u rasmiy e’lon qilinishidan oldin o‘ldirilganini aytdi. Shu sababli Safiiddin ham bosh kotib unvoni bilan dafn etiladi.
Qosimning ta’kidlashicha, Nasrulloh Bayrut chekkasida “eski va yangi aeroport yo‘llari o‘rtasidagi tanlagan yer uchastkasida”, Safiiddin esa Livanning janubidagi Deyr Qanun shahrida dafn etiladi.
“Hizbulloh” va Isroil o‘rtasidagi jangovar harakatlar noyabr oyida imzolangan sulhdan so‘ng to‘xtagan bo‘lsa-da, Isroil aviatsiyasi Livan hududiga zarba berishni davom ettirmoqda. Yahudiy davlati “Hizbulloh”ni guruhni kelishuvni buzganlikda ayblamoqda. “Hizbulloh” mojarolar uchun javobgarlik Isroil zimmasida ekanini ta’kidlab, tashqi kafillar — AQSH va Fransiyani shartnoma shartlariga rioya qilishga majburlashga chaqirgan
Izoh (0)