Toshkent shahar hokimi o‘rinbosari, shahar xotin-qizlar boshqarmasi boshlig‘i Shahnoza Sultonova poytaxtda ajrim yoqasiga kelib qolgan, umuman yarashishidan umid yo‘q, oilaning yarashishi ayolga turli xil bosim olib kelishi mumkin bo‘lgan oilalarning ajrimi uchun hech qanday to‘siq yo‘qligini aytdi. Hokimi o‘rinbosari, shuningdek, tuman hokimligi masʼullari va FHDY mudirasi statistika “o‘sib ketmasligi” uchun ularning ajrashishiga taqiq qo‘yilmasligini maʼlum qildi. Bu haqda u Yangihayot tumani hokimligida tashkil etilgan matbuot anjumanida gapirdi.
2025-yilning 28-fevral, juma kuni Toshkent shahrining Yangihayot tumani hokimligida matbuot anjumani tashkil etildi. Unda nafaqat tumanda, poytaxtda xotin-qizlar bilan bog‘liq muammolar va ularning ayni kundagi yechimlari haqida so‘z bordi.
Matbuot anjumanida so‘z olgan “Daryo” jurnalisti masʼullar, xususan Toshkent shahar hokimi o‘rinbosari va Yangihayot hokimligi masʼuliga yuzlanib, poytaxtda ajrim yoqasiga kelib qolgan oilalarni yarashtirish borasida yaxshi ishlar olib borilayotganini taʼkidlab, kezi kelganda masʼullar statistika “o‘sib ketmasligi” uchun umuman yarashishidan umid yo‘q, turli aralashuvlar orqali yarashtirilsa, oila bekasiga tazyiq va zo‘ravonliklar bo‘lishi mumkin bo‘lgan oilalarning ajralishiga to‘siq qo‘yilayotgani haqida so‘radi.
Savolga javob bergan Toshkent shahar hokimi o‘rinbosari, shahar xotin-qizlar boshqarmasi boshlig‘i Shahnoza Sultonova aynan poytaxt va uning tumanlaridagi masʼullar — tuman xotin-qizlar bo‘limi boshlig‘i va FHDY mudirasi ajrimlar statistikasi oshib ketmasligi uchun bunday to‘siqlar qo‘ymasligini, hududda bu kabi holatlar yo‘qligini aytdi.
Toshkent shahri va uning barcha tumanlarida ham bu kabi majburlash holatlari yo‘q, dedi Shahnoza Sultonova.
Masʼulning aytishicha, ajrashish niyatida masʼullarga murojaat qilgan er-xotinning qabulda o‘zini tutishi, birga o‘tirish yoki o‘tirmasligi, ayol kishining lab burishi bu oilaning yarashish niyati bor yoki yo‘qligidan darak beradi.
Ajrashmoqchi bo‘lib keldik degan er-xotinning yonma-yon o‘tirishida ko‘zining, og‘zining cheti uchib turishi, yelkasining qimirlab turishi, gapirayotganda bir-biriga ensa qotirishi, agressiya borligi va ayolning eriga umuman itoat etmasligi oilaning yarashish niyati bor yoki yo‘qligini aniq ko‘rsatadi. Bunday oilalarga qanchalik gapirmang, maslahat bermang foydasi yo‘q. Oila ajrashish nuqtasiga kelib qolgan bo‘lsa, biz hech qachon ularni shunchaki yarashtirib, vaqtinchalik chora qilmaymiz. Va hech qanday muddat bermaymiz”, deydi shahar hokimi o‘rinbosari.
Masʼulning maʼlumot berishicha, poytaxtdagi ajrimlarga ko‘pincha uchinchi shaxslarning aralashuvi sabab bo‘lmoqda.
Aslida yashash niyati bor, biroq har ikki tomondagi uchinchi shaxslarning, ota-onalarning aralashuvi sabab mo‘ltillab turgan yoshlar masalasini o‘rganganimizda aslida muammo uchinchi shaxslarda ekanini bilsak, yoshlar bilan emas aynan shu uchinchi shaxslar bilan ishlaymiz. Va yosh oilaning yarashib ketishini taʼminlaymiz, deydi Shahnoza Sultonova.
Yangihayot tumani hokimi o‘rinbosari, tuman oila va xotin-qizlar bo‘limi boshlig‘i Iroda Abdullayeva esa tumanda ish boshlagan paytda 7-10 kishilik aʼzodan iborat oilaviy qadriyatlarni mustahkamlash deb nomlangan yarashtiruv komissiyasi aʼzolarini kamaytirib, oilaviy mojarolarni komissiyagacha bo‘lgan jarayonda ko‘rib chiqish amaliyotini joriy qilganini aytdi.
Bir oila sirini 10 kishidan iborat komissiya eshitishi va bu oilaning ertaga yarashishidan umid qilishimiz shaxsan menga noto‘g‘ridek ko‘ringan. Oilaning ko‘chaga chiqishi kerak bo‘lmagan sirlarini 10 kishi eshitgani va bu gaplarning sirliligi qolmasligi judayam uyatli holat. Shu sabab oila masalasini avval tor doirada o‘rganib chiqish amaliyotini yo‘lga qo‘yganmiz. Yaʼni komissiyaga qadar. Masalan, oila ertaga yarashib ketib, chiroyli yashab yurganda o‘sha dilxiraliklar va aytilishi kerak bo‘lmagan gaplarni eshitgan komissiya aʼzolari bilan yuz-yuzga tushishi, ko‘z-ko‘zga tushishi degan gap bor-da, deydi Iroda Abdullayeva.
Eslatib o‘tamiz, 2024-yilda O‘zbekiston hududlari bo‘yicha eng ko‘p oilaviy ajrimlar Toshkent shahrida kuzatilgan bo‘lib, 5913 tani tashkil qilgan.
Izoh (0)