Har birimizning hayotimizda afsuslanadigan lahzalar va voqealar sodir bo‘lishi mumkin. Dunyodagi eng badavlat tadbirkorlardan biri, Microsoft asoschisi Bill Geyts ham bundan mustasno emas.
Milliarder The Times nashriga bergan intervyusida 2021-yilda rafiqasi Melinda Geyts bilan ajrashganiga qanday munosabatda ekanligini haqida so‘zlab berdi. Ma’lum bo‘lishicha, Bill Geyts rafiqasi bilan ajrashishni hayotidagi eng katta xatolik va omadsizlik deb biladi.
“Bu men afsuslanadigan eng katta xatolarimdan biri. Ajrim xatolarim ro‘yxatida eng boshida turadi. Chunki ularning hech qaysi biri oilamning buzilishi kabi dolzarb emas”, deya tan oldi Geyts.
Geyts umrining 27 yilini birga o‘tkazgan rafiqasi bilan ajrashganidan afsusda ekanligining yana bir sababi bor. Ma’lum bo‘lishicha, uning ota-onasi birgalikda 45 yil baxtli hayot kechirgan va Bill ham ularning hikoyasini takrorlashni orzu qilgan. Shuningdek, u butun umrini yagona ayol bilan o‘tkazish g‘oyasiga amal qilishni istagan. Bu qadriyat, ayniqsa, umumiy farzandlar va iliq xotiralar bo‘lgan insonlar uchun muhimdir:
“Melinda bilan uchrashganimizda men o‘z kasbimda yetarlicha yutuqlarga erishgan edim, ammo u qadar muvaffaqiyatli emas edim. Haqiqiy muvaffaqiyatga u bilan birgalikda yashagan hayotda yetishdim. Melinda ko‘p ishlarda menga yelkadosh bo‘ldi”.
Bill va Melinda 1987-yilda Microsoft ofisida tanishgan va 1994-yilda Gavayida turmush qurishgan. Ularning Jennifer, Rori va Fibi ismli uch nafar farzandi bor.
Geyts sobiq rafiqasi haqida gapirar ekani, uning farzandlar tarbiyasiga qo‘shgan hissasi haqida alohida qayd etdi:
“Men farzandlarim bilan otamga nisbatan ko‘proq vaqt o‘tkazdim, ammo ayolimdek faol bo‘lmadim. Melinda qilgan mehnatning 10 dan birini bajara oldim, xolos. U umrining katta qismini farzandlarimizga g‘amxo‘rlik qilish va tarbiyalashga bag‘ishladi”, dedi Bill.
Ammo Geyts sobiq rafiqasining bir ishini kechira olmaydi: 2000 yilda er-xotin Bill va Melinda Geyts jamg‘armasiga asos soldi, u butun dunyo bo‘ylab qashshoqlik va kasalliklarga qarshi kurashga bag‘ishlangan xayriya fondi edi. Ajrimdan so‘ng 2024-yil may oyida Melinda tashkilotni tark etdi. Bu qaror Geyts uchun jiddiy zarba bo‘ldi.
“Ajrim ikkimiz uchun ham qiyin bo‘ldi, ammo Melinda fondni tark etishga qaror qilganidan men qattiq ranjidim va kutmagan edim” dedi tadbirkor.
Hozirda sobiq er-xotinlar shaxsiy hayotini qurishda davom etmoqda. 2023-yil fevral oyida Geyts Oracle kompaniyasi sobiq menejeri Mark Xerdning rafiqasi Paula Xerd bilan birga ekanligini e’lon qildi. Melinda esa jurnalist Jon Dyu Pre bilan birga.
Izoh (0)