O‘zbekistonda 2024-yili (4-fevral holatiga) iste’molchilarga 1 mlrd chek uchun 1 trln so‘mdan ortiq keshbek to‘langan. Bu haqda Soliq qo‘mitasi matbuot xizmati xabar berdi.
Qayd etilishicha, shundan 89,2 mlrd so‘mi dekabr oyi uchun berilgan.
To‘langan keshbeklarning eng katta qismi Toshkent shahriga to‘g‘ri keldi — 412,2 mlrd so‘m. Shuningdek, Toshkent viloyati (107,1 mlrd so‘m) va Samarqand viloyati (93,2 mlrd so‘m) ham yetakchi bo‘lib turibdi.
Farg‘ona (75,6 mlrd so‘m) va Andijon (52 mlrd so‘m) viloyatlari esa “kuchli beshlik”dan joy olgan.
Nisbatan past ko‘rsatkichlar Sirdaryo va Jizzax viloyatlarida qayd etilgan. Mazkur hududlarda yil davomida mos ravishda 15,5 mlrd va 22,5 mlrd so‘m to‘langan.
Keshbek qaytarish tizimi
O‘zbekistonda 2024-yilning 1-iyulidan boshlab naqd puldagi to‘lovlar uchun keshbek qaytarilishi bekor qilinishi mumkinligi aytilgandi. Bu haqda “Yashirin iqtisodiyotga qarshi kurashish bo‘yicha kompleks chora-tadbirlarni amalga oshirish to‘g‘risida”gi prezident qarori loyihasida ko‘zda tutilgan.
“Daryo” tanishib chiqqan hujjat loyihasiga ko‘ra, chakana savdo, xizmat ko‘rsatish hamda umumiy ovqatlanish sohalarida jismoniy shaxslar tomonidan to‘lovlar mobil ilovalar (naqdsiz) va plastik karta orqali amalga oshirilganda 1 foiz miqdorida keshbek qaytariladi hamda to‘lovlar naqd pulda amalga oshirilganda keshbek qaytarish tartibi bekor qilinishi belgilanmoqda.
Ma’lumot uchun, chakana savdo, umumiy ovqatlanish va aholiga maishiy xizmat ko‘rsatish obyektlarida amalga oshirilgan xarid uchun berilgan cheklar uchun keshbek 2022-yildan berila boshlagandi.
2024-yil yanvardan aholiga qaytariladigan 1 foizlik keshbek summasiga chegaraviy miqdor o‘rnatildi.
Izoh (0)