AQSH prezidenti Donald Tramp Kaliforniya shtatidagi yong‘inlardan jabrlanganlarga yordam uchun to‘plangan 100 million dollar yo‘qolganini ma’lum qildi. Bu haqda u o‘zining Truth Social ijtimoiy tarmog‘ida yozdi.
“100 million dollar yo‘qoldi. Bu mablag‘ Los Anjeles yong‘inlaridan jabrlanganlarga yordam berishi kerak edi. To‘g‘ri boshqarilganda, bu yong‘inlar hech qachon sodir bo‘lmagan bo‘lardi”, deb ta’kidladi u.
Shuningdek, Tramp Kaliforniya gubernatori Gevin Nyusomni yong‘inlar paytida harakatsizlikda ayblab, shaharni qayta tiklashga chaqirdi. Amerika yetakchisi bunday katta mablag‘ning yo‘qolishini firibgarlik deb atab, buni AQSH Demokratik partiyasiga bog‘lagan.
“FireAid — bu haqiqiy falokat. Bu demokratlardan ilhom olgan yana bir firibgarlik sxemasiga o‘xshaydi”, deb yozdi AQSH prezidenti.
Ma’lumot uchun, Kaliforniyaning janubiy qismida, Los Anjeles atrofida yanvar oyida tabiiy yong‘inlar tufayli 30 dan ortiq kishi halok bo‘ldi, 18 mingga yaqin turli xil inshootlar vayron bo‘ldi. Jamoat tashkilotlari, shu jumladan, Demokratik partiya bilan bog‘liq tashkilotlar yong‘inlardan jabrlangan yoki mol-mulkidan ayrilganlar uchun mablag‘ yig‘ishni e’lon qildi. Ushbu tashabbus doirasida 30-yanvar kuni Kaliforniyada xonandalar Billi Aylish, Ledi Gaga, Keti Perri va boshqa mashhur ijrochilar ishtirokida xayriya konserti o‘tkazildi. Taxminan 100 million dollar yig‘ilgan, biroq Fox News telekanalining xabar berishicha, mablag‘lar keyinchalik jabrlanganlarga to‘g‘ridan to‘g‘ri berilmay, bir qator nodavlat tashkilotlar o‘rtasida taqsimlangan.
Izoh (0)