O‘zbekistonda soliq organlariga 2024-yil 1-iyuldan soliq to‘lovchi hududiga kirish va binoni ko‘zdan kechirish vakolati berilishi mumkin. Bu haqda “Yashirin iqtisodiyotga qarshi kurashish bo‘yicha kompleks chora-tadbirlarni amalga oshirish to‘g‘risida”gi prezident qarori loyihasida ko‘zda tutilgan.
Unga ko‘ra, quyidagi holatlar aniqlangan taqdirda tadbirkorlik subyektlarini xabardor qilmasdan hamda biznes ombudsmanni tekshirish kunida xabardor qilgan holda belgilangan tartibda sayyor tekshiruvlarini o‘tkazish vakolati beriladi:
- to‘lov intizomiga rioya qilmaslik, shu jumladan nazorat-kassa texnikasining va (yoki) hisob-kitob terminallarining qo‘llanilishi tartibini buzish, xaridorga fiskal chek bermaslik;
- ishchi xodimlar sonini yashirish;
- yer qa’ridan foydalanishda soliq qonunchiligini buzish.
Yirik soliq to‘lovchilar sonini optimallashtirish va hududiy soliq inspeksiyalarining faoliyatini kuchaytirish maqsadida yirik soliq to‘lovchi toifasiga o‘tish uchun yillik tovar aylanmasining amaldagi chegarasi 170 milliard so‘m etib belgilanadi hamda paxta-to‘qimachilik klasterlari, to‘qimachilik sohasidagi to‘lovchilar va “sharob savdo” korxonalari ma’murchiligi hududiy soliq boshqarmalariga o‘tkaziladi.
Amaldagi soliq qonunchiligida soliq bazasini yashirganlik va to‘lovlardan qochish yoki to‘liq to‘lamaslik uchun belgilangan javobgarlik asoslari bojxona qonunchiligida ham qo‘llaniladi.
Bunda:
- tovarlarni deklaratsiyalamaslik yoki noto‘g‘ri deklaratsiyalash natijasida bojxona to‘lovlari to‘liq to‘lanmaganda yoki uning miqdori kamaytirilganda;
- bojxona to‘lovlari bo‘yicha imtiyozli tovarlardan boshqa maqsadlarda yoki maqsadsiz foydalanish va ularni tasarruf etish tartibi buzilganda;
- tovarlar shartli chiqarib yuborilgan paytdan eʼtiboran uch yil ichida boshqa maqsadlarda foydalanilganda bojxona organlari tomonidan bojxona to‘lovlarini to‘lash majburiyati yuzaga kelgan summasining 20 foizi miqdorida jarima solishga sabab bo‘ladi.
Mazkur banddagi holatlar yuz berganda bojxona imtiyozlari bekor qilinadi va bojxona to‘lovlarini to‘lash majburiyati tiklanadi.
Eslatib o‘tamiz, kameral soliq tekshiruvini o‘tkazishda soliq organlarining quyidagi huquqlari bekor qilingandi:
- soliq to‘lovchining hududiga kirish;
- soliq to‘lovchining hududini va binolarini ko‘zdan kechirish;
- soliq to‘lovchidan hujjatlarni talab qilib olish va uni chaqirtirish;
- soliq to‘lovchining hujjatlari va buyumlarini olib qo‘yish.
Avvalroq ushbu qaror loyihasi bilan uy-joy va avtomobillar oldi-sotdisini naqd pulsiz shaklga o‘tkazilish taklif etilayotgani, naqd puldagi to‘lovlar uchun keshbek qaytarilishi bekor qilinishi mumkinligi haqida xabar berilgan edi.
Izoh (0)