Soliq qo‘mitasi I yarim yillikda qaysi hududlarda iste’molchilar ko‘proq keshbekka ega bo‘lgani haqida ma’lumot berdi.
Unga ko‘ra, joriy yil boshidan (29-iyul holatiga) iste’molchilarga 421,1 million chek uchun 429,5 milliard so‘m keshbek to‘langan. Shundan qariyb 71,5 milliard so‘mi iyun oyi uchun berilgan. To‘langan keshbeklarning eng katta qismi quyidagi hududlarga to‘g‘ri kelmoqda:
- Toshkent shahri — 176,9 milliard so‘m;
- Toshkent viloyati — 42,5 milliard so‘m;
- Samarqand viloyati — 36,8 milliard so‘m;
- Farg‘ona viloyati — 31,4 milliard so‘m;
- Qashqadaryo viloyati — 20,5 milliard so‘m.
O‘zbekistonda 1-iyuldan boshlab naqd puldagi to‘lovlar uchun keshbek qaytarilishi bekor qilinishi mumkinligi aytilgandi. Bu haqda “Yashirin iqtisodiyotga qarshi kurashish bo‘yicha kompleks chora-tadbirlarni amalga oshirish to‘g‘risida”gi prezident qarori loyihasida ko‘zda tutilgan.
“Daryo” tanishib chiqqan hujjat loyihasiga ko‘ra, 2024-yil 1-iyuldan boshlab chakana savdo, xizmat ko‘rsatish hamda umumiy ovqatlanish sohalarida jismoniy shaxslar tomonidan to‘lovlar mobil ilovalar (naqdsiz) va plastik karta orqali amalga oshirilganda 1 foiz miqdorida keshbek qaytariladi hamda to‘lovlar naqd pulda amalga oshirilganda keshbek qaytarish tartibi bekor qilinishi belgilanmoqda.
- Ma’lumot uchun, chakana savdo, umumiy ovqatlanish va aholiga maishiy xizmat ko‘rsatish obyektlarida amalga oshirilgan xarid uchun berilgan cheklar uchun keshbek 2022-yildan berila boshlagandi.
- 2024-yil yanvardan aholiga qaytariladigan 1 foizlik keshbek summasiga chegaraviy miqdor o‘rnatildi.
Izoh (0)