Tailand qurolli kuchlari Kambodja bilan chegaradagi bahsli hudud hisoblangan Pxu Ma Kua cho‘qqisi ustidan to‘liq nazorat o‘rnatdi. Bu haqda Tailandning The Nation nashri xabar bermoqda.
Ma’lum qilinishicha, Tailand bo‘linmalari Kambodja mudofaa chizig‘idan 300 metr ichkariga kirib, Ta Taxav qishlog‘iga yaqinlashgan.
Tailand Qirollik armiyasi (RTATrend)ning xabar berishicha, Kambodja qo‘shinlarining hududni qaytarib olishga so‘nggi urinishi yarim tunda sodir bo‘lgan, biroq bu harakat bartaraf etilgan. Hujumlar davom etishiga qaramay, Tailand kuchlari o‘z mavqelarini saqlab qolishga erishgan.
Ertalabga kelib armiya Pxu Ma Kua cho‘qqisidagi vaziyat to‘liq barqarorlashganini ma’lum qildi. Tailand askarlari milliy bayroqni o‘rnatishgan.
“Biz hech kimning hududimizga daxl qilishiga yo‘l qo‘ymaymiz”, deya ta’kidlangan bayonotda.
24-iyul kuni Tailand va Kambodja harbiylari o‘rtasida qurolli to‘qnashuvlar boshlandi. Tailand rasmiylarining ta’kidlashicha, Kambodjaning 6 nafar qurollangan askari mamlakat chegarasiga yaqinlashgan. Oradan ko‘p o‘tmay, havoda dronlar ham paydo bo‘lgan. Tailandliklar vaziyatni yumshatish uchun ularga ogohlantirish bergani, biroq Kambodja tomoni bunga o‘t ochish bilan javob qaytarganini da’vo qildi.
Ushbu to‘qnashuvlardan oldinroq Tailand elchixonasi ehtimoliy mojaro sabab o‘z fuqarolarini Kambodjani tark etishga chaqirgan edi. Bundan tashqari, mamlakatning Kambodjadagi elchisi ham 23-iyul kuni ortga chaqirib olingandi.
