O‘zbekistonda mart oyi uchun 57 milliard so‘mdan ortiq keshbek to‘lashga tasdiqlandi. Bu haqda Soliq qo‘mitasi xabar berdi.
Unga ko‘ra, joriy yilning mart oyida “Soliq” mobil ilovasi foydalanuvchilari tomonidan 86 milliard so‘m keshbek yig‘ilgan bo‘lib, shundan 2,2 milliondan ortiq iste’molchiga 57,8 milliard so‘m keshbek to‘lashga tasdiqlandi.
Keshbeklarni ilovaga biriktirilgan bank kartasiga o‘tkazib olish mumkin. Tadbirkorlik subyektlari tomonidan soliq hisobotlari topshirilishi, hisobotlardagi kamchiliklar tuzatilishi, soliq qarzdorligi kamaytirilishi inobatga olinib, qolgan keshbek summalari avtomatik tarzda tasdiqlab boriladi.
Joriy yilning mart oyida mobil ilovada 68,3 million dona chek ro‘yxatdan o‘tkazilgan. Bu 2023-yil mart oyiga nisbatan 23,3 milliontaga ko‘p.
“Soliq” mobil ilovasida qaysi cheklarga va nima uchun keshbek tasdiqlanmayotganini oson bilib olish mumkin. Iste’molchilar bir oyda BHMning 60 baravaridan (20 400 000 so‘m) oshmagan xaridlari uchun 1 foiz keshbek (204 000 so‘m) olishi mumkin.
Izoh (0)