O‘zbekistonda 4 oyda zo‘ravonlikka uchragan 2 317 nafar xotin-qizga yordam ko‘rsatildi. Bu haqda Ijtimoiy himoya milliy agentligi xabar berdi.
Unga ko‘ra, 2025-yil I-chorak davomida jami 17 878 nafar ijtimoiy himoyaga muhtoj aholiga yuridik yordam va huquqiy maslahatlar ko‘rsatilgan. Xususan, xizmat turi bo‘yicha:
- 1 162 nafar shaxsning manfaatlarida fuqarolik va ma’muriy sudlarga da’vo arizasi kiritilgan yoki yozib berilgan;
- 470 nafar ijtimoiy himoyaga muhtoj aholi manfaatlarini ko‘zlab davlat organlari va tashkilotlariga talabnoma kiritilgan;
- 16 246 nafar shaxsga ijtimoiy xizmat va yordamlarni ko‘rsatish sohasida huquqiy tushuntirish va maslahat (konsultatsiya) berish xizmatlari ko‘rsatilgan.
Aholi toifalari bo‘yicha esa yuqori ko‘rsatkichlar:
- kam ta’minlangan oilalarning a’zolari — 12 662 nafar (70,8 foiz);
- nogironligi bo‘lgan shaxslar — 1 758 nafar (9,8 foiz);
- tazyiq va zo‘ravonlikka uchragan xotin-qizlar — 2 317 nafar (13 foiz);
- o‘zgalar parvarishiga muhtoj shaxslar — 460 nafar (2,6 foiz);
- yetim va ota-ona qaramog‘idan mahrum bo‘lgan bolalar — 260 nafar (1,5 foiz);
- ota-onasi xorijiy davlatlarga ketgan, shu jumladan tashqi mehnat migratsiyasiga ketgan bolalar — 122 nafar (0,7 foiz);
- muayyan yashash joyiga ega bo‘lmagan shaxslar — 94 nafar (0,5 foiz);
- boshqa ijtimoiy himoyaga muhtoj aholi toifalari — 206 nafar (1,1 foiz) qayd etildi.
“Kambag‘al oilalarni davlat tomonidan ijtimoiy qo‘llab-quvvatlash tizimini yanada takomillashtirish to‘g‘risida”gi prezident farmoni qabul qilindi.
Mazkur farmonga muvofiq, 2025-yil 15-maydan boshlab Kambag‘al oilalar reyestriga kiritilgan hamda ushbu reyestrga tushish xavfi mavjud bo‘lgan oilalar “qizil”, “sariq” va “yashil” toifalarga ajratiladi. Ular uchun belgilangan ijtimoiy qo‘llab-quvvatlash choralari ushbu toifalarga muvofiq tarzda amalga oshiriladi.
“Qizil” toifaga quyidagi mezonlarga mos keluvchi oilalar kiritiladi:
- oila a’zolarining har biriga to‘g‘ri keladigan o‘rtacha oylik daromadi minimal iste’mol xarajatlaridan kam bo‘lishi;
- a’zolarning kamida biri sog‘lig‘i holatiga ko‘ra mehnatga layoqatsiz bo‘lishi;
- parvarishga muhtoj a’zosi, jumladan nogironligi bo‘lgan farzandi bo‘lishi;
- oila tarkibida yolg‘iz yashovchi, o‘zgalar parvarishiga muhtoj keksa yoki nogironligi bo‘lgan shaxs bo‘lishi;
- boquvchisini yo‘qotgan yoki boquvchisi jazoni ijro etish muassasasida bo‘lgan oilalar.
“Sariq” toifaga quyidagilar kiradi:
- oila a’zolarining har biriga to‘g‘ri keladigan o‘rtacha oylik daromadi minimal iste’mol xarajatlaridan kam bo‘lishi;
- a’zolari sog‘lig‘i holatiga ko‘ra mehnatga layoqatli bo‘lishi.
“Yashil” toifaga quyidagilar kiritiladi:
- oila a’zolarining har biriga to‘g‘ri keladigan o‘rtacha oylik daromadi minimal iste’mol xarajatlarining 1 baravaridan 1,5 baravarigacha bo‘lishi;
- oila ilgari “qizil” yoki “sariq” toifaga mansub bo‘lgan bo‘lsa;
- oilaning kambag‘al oilalar reyestriga kiritilish ehtimoli yuqori bo‘lsa.
Mazkur toifalash tizimi orqali ehtiyojmand oilalarni yanada aniqroq aniqlash va ular uchun moslashtirilgan ijtimoiy yordam choralarini ko‘rish ko‘zda tutilgan.
Prezident mahallalarda kambag‘allikni qisqartirish bo‘yicha qilingan ishlar sarhisobi va 2025-yil uchun ustuvor vazifalarga bag‘ishlangan videoselektor yig‘ilishida 2025-yil bandlikni taʼminlash va kambag‘allikdan chiqarishda eng muhim va hal qiluvchi yil bo‘lishini ta’kidlagandi. Har bir mahalla bo‘yicha maqsadli ko‘rsatkichlar belgilandi. Aholi bandligini ta’minlashga qaratilgan “mahalla loyihasi” dasturi doirasida ajratiladigan 1 milliard dollar kredit resurslari banklar va hududlar kesimida taqsimlandi
Kambag‘allikni qisqartirish va bandlik vazirligi bergan ma’lumotga ko‘ra, O‘zbekistonda kambag‘allik darajasi 2024-yil yakuniga ko‘ra 11 foizdan 8,9 foizga kamaydi.
Izoh (0)