O‘zbekistonda hozirgi 6 ta vazirlikda tarqoq bo‘lgan ijtimoiy xizmatlar birlashtirilib, Ijtimoiy himoya milliy agentligi tashkil etiladi. Bu haqda O‘zLiDePdan O‘zbekiston prezidentligiga nomzod Shavkat Mirziyoyev o‘z saylovoldi dasturida ma’lum qildi.
Agentlik o‘zida hozirgi 6 ta vazirlik (Kambag‘allik, sog‘liqni saqlash, maktab ta‘limi, moliya, ichki ishlar, oliy ta‘lim)da tarqoq bo‘lgan ijtimoiy xizmatlarni birlashtiradi. Yangi agentlik uchun kamida 10 foiz xodimlar nogironligi bo‘lgan shaxslar orasida tanlov asosida ishga olinadi.
Qayd etilishicha, so‘nggi olti yilda ijtimoiy yordam ko‘lamini 5 barobar oshirib, 2 milliondan ortiq oilani qamrab olgan. Hozirgi kunda har bir ehtiyojmand oila budjet va “3 ta daftar” tizimi orqali moddiy yordam olmoqda.
Bu maqsadlarga budjetdan har yili ajratiladigan mablag‘ni 18 trillion so‘mga yetkazilgan. Qiyoslash uchun: 2016-yilda bu raqam 2,2 trillion so‘mni tashkil etardi. Ijtimoiy taʼminotga yo‘naltirilgan mablag‘larning yalpi ichki mahsulotdagi ulushi 2,5 barobar ko‘paydi (2016-yildagi 0,9 foizdan 2022-yilda 2,2 foizga).
“Lekin ijtimoiy himoya faqat pul berish bilan cheklanib qolmoqda. Aslida, bu tizimning vazifasi aholini og‘ir ahvoldan chiqarish va jamiyatda o‘z o‘rnini egallashi uchun ko‘mak berishdan iborat bo‘lishi kerak. Misol uchun, bizda og‘ir vaziyatga tushgan 30 ta toifadagi 9 million aholi bor. Bular — nogironligi bor shaxslar, yolg‘iz keksalar, boquvchisini yo‘qotganlar, oilada zo‘ravonlikka uchragan ayollar. Shu bois, ijtimoiy xizmatlar sohasini butkul qayta ko‘rib chiqamiz”, — deydi Shavkat Mirziyoyev.
Qayd etilishicha, endi har bir mahallada professional ijtimoiy xodimlar faoliyati yo‘lga qo‘yiladi va ular ijtimoiy xizmatlarni manzilli asosda ko‘rsatadi. Og‘ir hayotiy ahvolga tushgan yoki tushish xavfi yuqori bo‘lgan har bir oila bo‘yicha alohida “ijtimoiy xizmat ishi” ochiladi.
Ushbu oilalarda sharoitni yaxshilash, ularga davolash, dorilarni yetkazish, farzandlarini bog‘cha va maktabga joylashtirish, moddiy yordam berish kabi ijtimoiy xizmatlar ko‘rsatiladi. Og‘irroq vaziyatdagi oilalarga psixologik yordam ham beriladi. Bunday oilalarning hayot sifati amalda yaxshi tomonga o‘zgargandan keyingina, “ijtimoiy xizmat ishi” yopiladi.
Izoh (0)