Oliy Majlis Senatining 55-yalpi majlisida “Bolalarni zo‘ravonlikning barcha shakllaridan himoya qilish to‘g‘risida”gi qonuni muhokamasida Senat raisi Tanzila Norboyeva zo‘ravonlik qilgan shaxs bilan hech kim ishlamayotganini aytib o‘tdi.
Himoya orderi joriy qilindi, bir yilgacha cho‘zib berildi. Zo‘ravonlikka uchragan ayollarga ham tibbiy yordam ko‘rsatiladi, kasbga o‘qitiladi, ishga joylanadi, u bilan psixologik ishlaydi, ijtimoiy xodim ishlaydi, lekin zo‘ravonlik qilgan shaxs bilan hech kim ishlamaydi. U yo ichkilikka berilgan bo‘ladi, yo salomatligida muammosi bor odam bo‘ladi. Shuning uchun u bilan hech kim ishlamaydi. Ayol bilan ishlanadi, lekin u bilan hech kim ishlamaydi.
Himoya orderining muddati tamom bo‘lgandan keyin ayol yana o‘sha zo‘ravonning uyiga kiritib qo‘yiladi va bu ish yana davom etaveradi. Shuning uchun buning ildizi bilan ishlash kerak degan masalaga e’tiborni kuchaytirish kerak bo‘ladi.
Bu qonunni hozir qabul qilganimiz bilan, masalan, bolalar zo‘ravonligi sababli ikki mingdan ziyod shaxs ota-onalik huquqidan mahrum qilindi. Bu bejiz emas. Agar tuzatish dasturlarini samarali yo‘lga qo‘ymasak, ota-onalar huquqidan mahrum qilinish holati yoki ayollarning bora-bora o‘z joniga qasd qilish holatiga ham olib kelishi mumkin. Qachonki, biz shu ishni yo‘lga qo‘ymas ekanmiz, zo‘ravonlik holatlari davom etaveradi, dedi Tanzila Norboyeva
Senat raisining qo‘shimcha qilishicha, bu tizim bo‘yicha prokuratura, Ichki ishlar vazirligida xodimlarni o‘qitish, qayta tayyorlash uchun o‘quv muassasalarida qisqa muddatli kurslar tashkil qilinishi kerak.
Ma'lumot uchun, oxirgi uch yilda ikki ming nafardan ziyod shaxs ota-onalik huquqidan mahrum qilingan
Yalpi majlisda senatorlar “Bolalarni zo‘ravonlikning barcha shakllaridan himoya qilish to‘g‘risida”gi qonunini ma’qulladi. Unga ko‘ra:
- bolalarni zo‘ravonlikning barcha shakllaridan himoya qilish sohasidagi munosabatlar huquqiy tartibga solinadi;
- zo‘ravonlikdan jabrlangan shaxs ariza bilan tegishli organlarga yoki sudga murojaat qilishi, bepul huquqiy, iqtisodiy, ijtimoiy, psixologik, tibbiy va boshqa yordam olishi mumkin bo‘ladi;
- zo‘ravonlikdan jabrlangan bolalarga himoya orderi beriladi;
- zo‘ravonlikdan jabrlanuvchi va o‘ziga nisbatan zo‘ravonlik xavfi ostida bo‘lgan bolalar aniqlanib, ularning hisobi yuritiladi.
Izoh (0)