Jahon hamjamiyati 25-noyabrni Xotin-qizlarga nisbatan zo‘ravonlikka barham berish kuni sifatida nishonlaydi. Ijtimoiy himoya milliy agentligi direktori birinchi o‘rinbosari Shahnoza Mirziyoyevaning yozishicha, bu sana har bir ayol eʼzozlanadigan, so‘zi tinglanadigan, orzulari kelajak sari yo‘lga aylanadigan dunyoda yashashga loyiq ekani haqidagi navbatdagi eslatmadir.
“Bugun biz birgalikda zo‘ravonlikka nisbatan: “Yetar, bas!” deya xitob qilamiz. Qo‘rquv va shubha-gumonlarni ishonch hissiga aylantirish vaqti keldi. Har bir ayol tinglanishi va sevikli bo‘lishiga erishish fursati yetdi.
Ijtimoiy himoya milliy agentligi nafaqat so‘zda, balki amalda ham gapiradi: Biz qo‘llab-quvvatlash uchun shu yerdamiz! Biz himoya qilish uchun shu yerdamiz! Biz har bir ayol, har bir qiz hayoti qadrli bo‘lishi uchun kurashyapmiz! Zo‘ravonliksiz dunyo xayoldagi orzu emas, bu birgalikda erishsa bo‘ladigan maqsaddir”, deb yozdi Shahnoza Mirziyoyeva va zo‘ravonlikka qarshi kurash bo‘yicha Ijtimoiy himoya milliy agentligi vakili Diyora Keldiyorova ishtirokidagi videolavhani e’lon qildi.
Unda Diyora Keldiyorova zo‘ravonlikka uchragan ayol obrazini aks ettirgan.
“Bu mening hayotim emas. Men zo‘ravonlikka qarshiman. Biz o‘zimiz va farzandlarimiz hayoti uchun kurashamiz. Birinchi qadamni qo‘yishdan qo‘rqmang”, deydi Keldiyorova videolavhada.
Diyora Keldiyorova 2024-yilning avgustida Ijtimoiy himoya milliy agentligining gender tengsizligi va bolalarga nisbatan zo‘ravonlikka qarshi kurashish bo‘yicha maxsus vakili etib tayinlangandi.
U o‘zbek dzyudosi tarixida ilk bor oltin medalni qo‘lga kiritgan sportchidir. 28-iyul kuni dzyudo bo‘yicha O‘zbekiston terma jamoasi aʼzosi Diyora Keldiyorova -52 kg vazn toifasida Parij Olimpiadasida g‘oliblikni qo‘lga kiritgandi.
Shahnoza Mirziyoyeva u bilan uchrashib, Ijtimoiy himoya milliy agentligi bilan hamkorlikda bir qancha loyihalarni amalga oshirishni taklif qilgandi.
“Qudrat va bardosh ramzi bo‘lmish o‘zbek qizi Diyora Keldiyorovaga bugungi ishtiroki uchun minnatdorlik bildiraman”, deb yozdi Shahnoza Mirziyoyeva.
Izoh (1)
Men haligacha zoʻravonlik ostida yashayapman . Bir necha kun oldin erim boshimning orqa tomonlarini qisib boʻgʻib oʻldiraman deb qiynab urdi. Shundan beri qoʻllarim yuzlarim shishib yotibdi. Agar IIB borsang oʻldiraman 4 yil qamalib kelaman deb qoʻrqitadi. 4 ta bolam bor majbur chidab yashayapman ajrashaman desam ham oʻldiraman deb qoʻrqitadi