“Roma” klubi joriy mavsum yakunida jamoani tark etadigan Klaudio Ranyerining o‘rniga yangi bosh murabbiy izlamoqda. Relevo nashrining xabar berishicha, bu lavozimga asosiy nomzodlardan biri — “Nottingem Forest” ustozi Nunu Eshpiritu Santu bo‘lib turibdi.
Ma’lumotlarga ko‘ra, rimliklar allaqachon mutaxassis bilan bog‘langan va unga ikki yillik shartnoma taklif qilgan. Shuningdek, klub rahbariyati unga kelajakdagi ambitsiyali loyihaning bir qismi bo‘lishini va’da qilmoqda. Mazkur loyiha doirasida jamoa Italiya futbolida yuqori o‘rinlar uchun kurasha olishi taxmin qilinmoqda.
Mavsum yakuniga bir tur qolganida “Roma” A Seriyada 5-o‘rinni egallab turibdi (66 ochko). Jamoada Yevropa Chempionlar Ligasi yo‘llanmasini qo‘lga kiritish uchun imkoniyat saqlanib qolgan. Buning uchun “bo‘rilar” navbatdagi turda g‘alaba qozonishi, shuningdek, parallel o‘tadigan bahsda “Yuventus” ochko yo‘qotishi kerak.
Avvalroq OAVda Yurgen Klopp “Roma” boshqaruviga kelishi mumkinligi haqida xabarlar tarqalgan edi. Biroq keyinchalik nemis mutaxassisining vakillari bu haqiqatga zid ekanligini aytdi.
Shuningdek, ijtimoiy tarmoqlarda Rim klubi kiyinish xonasida Erik ten Hag nomi ham tez-tez tilga olinayotgani haqida mish-mishlar chiqqandi.
Izoh (0)