Oliy Majlis Qonunchilik palatasining Mehnat, sog‘liqni saqlash va ijtimoiy masalalar qo‘mitasida 21-may kuni migratsiya jarayonlarini boshqarish tizimini takomillashtirishga qaratilgan qonun loyihasi dastlabki tarzda ko‘rib chiqildi.
Mazkur qonun loyihasi bilan Vazirlar Mahkamasi huzuridagi Migratsiya agentligi O‘zbekistondan tashqarida ish qidirayotgan shaxslarni ishga joylashtirish bo‘yicha faoliyatni litsenziyalash, litsenziya talablari va shartlariga rioya etilishini nazorat qilish borasida vakolatli organ etib belgilanmoqda.
Shuningdek, xususiy bandlik agentliklariga xorijda vaqtincha mehnat faoliyatini amalga oshirish istagida bo‘lgan fuqarolarni kasb-hunarga va chet tillariga o‘qitish bo‘yicha o‘quv kurslarini tashkil etish hamda ushbu jarayonga hamkor xorijiy ish beruvchilarni jalb qilish huquqini berish nazarda tutilmoqda.
Bundan tashqari, xususiy bandlik agentliklari tomonidan litsenziya olish uchun zaxira qilinishi lozim bo‘lgan mablag‘lar miqdorini kamaytirish taklif etilmoqda.
Qonun loyihasi tashabbuskorlarining ta’kidlashicha, belgilanayotgan normalar xorijda vaqtincha mehnat faoliyatini amalga oshirish istagida bo‘lgan O‘zbekiston fuqarolarining huquqlarini himoya qilishga, sohaga xususiy sektorni yanada kengroq jalb qilishga hamda ko‘rsatiladigan xizmatlarni raqamlashtirishga xizmat qiladi.
Qonun loyihasi siyosiy partiyalar fraksiyalari muhokamasiga kiritish uchun tayyorlanmoqda.
O‘zbekistonda ayni paytda litsenziya asosida faoliyat olib borayotgan xususiy bandlik agentliklari soni 25 ta. Migratsiya agentligi respublika milliy manfaatlarini inobatga olgan holda, O‘zbekiston fuqarolarining mehnat migratsiyasi jarayonlarini tartibga solish va ularni xorijga tashkillashtirilgan holda yuborish tartibi to‘g‘risidagi xalqaro huquq normalari va qoidalariga asoslangan faoliyatni amalga oshiradi.
Izoh (0)