Andijon viloyati Qo‘rg‘ontepa tumanida quduqqa tushib ketgan 7 yoshli bola qutqarildi. Bu haqda FVV xabar berdi.
Unga ko‘ra, bugun, 16-may kuni soat 11:00 da Qo‘rg‘ontepa tumani, “Ibn Sino” MFY, Maktab ko‘chasida joylashgan uylarning biri hovlisidagi chuqurligi 40 metr, diametri 90 sm bo‘lgan suvsiz, hozirda foydalanishda bo‘lmagan quduqqa uy egasining 7 yoshli o‘g‘li ehtiyotsizlik oqibatida tushib ketgani, uni olib chiqishda amaliy yordam so‘rab FVBga murojaat qilingan.
Aytilgan manzilga FVB qutqaruvchilari yetib borib, maxsus texnikalar va anjomlar yordamida olib borilgan qutqarish ishlari natijasida bola quduqdan sog‘-salomat chiqarib olingan. Ayni vaqtda uning ahvoli yaxshi. Tibbiy ko‘rikdan o‘tkazish maqsadida shifoxonaga olib borilgan.
2024-yilning aprel oyida Chinoz tumanida 15 yoshli qiz ehtiyotsizligi oqibatida chuqurga tushib ketgandi. Shuningdek, Toshkent viloyati, Bo‘stonliq tumani, “Yakka tut” mahallasidagi uylarning birida fuqaro hojatxona uchun qazilgan 5 metrlik chuqurlikka tushib ketgan edi.
Baxtsiz hodisalardan qanday himoyalanish mumkin?
Baxtsiz hodisalardan to‘liq himoyalanish mumkin emas, lekin xavfni kamaytirish va o‘z xavfsizligingizni oshirish juda muhim. Buning uchun quyidagi choralarni ko‘ring:
Birinchi o‘rinda — sug‘urta polisi oling. Bu moliyaviy xavfdan himoyalanishning samarali usulidir. Uy, mashina va sog‘liq uchun sug‘urta orqali baxtsiz hodisalarning iqtisodiy zararini yengillatish mumkin.
Ogoh bo‘ling: qayerda bo‘lsangiz ham atrofingizdagi vaziyatni kuzating. Baxtsiz hodisalar ko‘pincha befarqlik yoki e’tiborsizlik sababli sodir bo‘ladi.
Bilim va ko‘nikmalarni oshiring.
Birinchi yordam ko‘rsatish bo‘yicha bilimlarni egallang, yong‘inga qarshi kurashish qoidalari va boshqa xavfsizlik bo‘yicha qo‘llanmalarni o‘qing. Uyda xavfsizlikni maksimal ta’minlang — tutun datchiklari va o‘t o‘chirgichlarni hozirlang.
Nosoz elektr simlari va qurilmalardan saqlaning. Atrofni kuzating: piyoda bo‘lsangiz, faqatgina telefonga emas, balki atrofga ham qarab yurishga harakat qiling. Yo‘l harakati qoidalariga rioya qiling.
Izoh (0)