Marokash shimolidagi Igran qishlog‘ida besh yashar Rayan ismli bola 1-fevral kuni chuqurligi 32 metr bo‘lgan quduqqa tushib ketdi. Quduqqa kamera tushirildi, qurilma bola jarohat olgan bo‘lsa-da, tirik ekanini ko‘rsatdi, deb yozadi Meduza.
Rayanni olib chiqish uchun quduq yonidan teshik qazib, bola turgan chuqurlikka yetib borishga, keyin quduq devorini teshishga qaror qilindi. Tuproq cho‘kishi xavfiga qaramay, ish tun-u kun davom etdi.
Besh kun davom etgan qutqaruv operatsiyasiga fuqaro mudofaasi bo‘linmalari, jandarmeriya va yordamchi kuchlardan (Marokashdagi ichki qo‘shinlarning analogi) o‘nlab odamlar, shuningdek, shifokorlar va mina qutqaruvchilari jalb etildi.
Qutqaruv operatsiyasini butun dunyo kuzatib bordi. #SaveRayan xeshtegi Twitter’da eng ommalashgan xeshteglardan biri bo‘ldi. Operatsiya joyidan Al Jazeera va Reuters akkauntlarida jonli efirlar uzatildi.
https://www.instagram.com/p/CZhP3yXqAqw/
5-fevral, shanba kuni Toshkent vaqti bilan yarim tunda qutqaruvchilar quduq tubiga yetib bordi. Afsuski, Rayan Oram o‘lik holda topildi, uning jasadi qarindoshlariga topshirildi. Marokash qiroli Muhammad VI bolaning ota-onasiga hamdardlik bildirdi.
Izoh (0)