Afg‘onistonning Zobul viloyatida 25 metrli quduqqa tushib ketgan va oradan deyarli uch kun o‘tib olib chiqilgan bola halok bo‘ldi. Bu haqda “Tolibon” siyosiy idorasining matbuot kotibi Anas Haqqoniy Twitter’da ma’lum qildi.
“Afsuski, bolakay Haydar bizni abadiy tark etdi. Mamlakatimiz bugun yana bir ulkan fojiani boshdan kechirmoqda”, — deb yozgan Haqqoniy Twitter’da.
9 yashar Haydar ismli bola yo‘lda yiqilib, quduqqa tushib ketgandi. Taxminan 25 metrli chuqurdan uni chiqarish ishlari deyarli uch kun davom etgan. Qutqaruvchilar bolani olish uchun 15 metrli tunnel qazigan hamda uni kislorod va oziq-ovqat bilan ta’minlashga muvaffaq bo‘lgan.
Sal avval Afg‘onistonning Baxtar agentligi 96 soat davom etgan operatsiyadan keyin bola qutqarilgani haqida xabar bergandi. Haydar vertolyot yordamida shifokorlar nazoratiga yuborilgani ham qayd etilgan.
Eslatib o‘tamiz, 1-fevral kuni Marokashda besh yashar Rayan ismli bola chuqurligi 32 metr bo‘lgan quduqqa tushib ketgandi. Unga yordam berish operatsiyasi besh kun davom etgan, ammo qutqaruvchilar kech qolgan.
Izoh (0)