“Oʻzbekneftgaz” AJ Boshqaruv raisi Mehriddin Abdullayev boshchiligidagi “Ishchi guruh” tomonidan Qashqadaryo viloyatida joylashgan konlarda gaz qazib chiqarishni koʻpaytirish va geologik-texnik tadbirlarni amalga oshirish boʻyicha amalga oshirilayotgan tadbirlarning holatini nazorat qilish ishlari davom etmoqda.
Boshqaruv raisi boshchiligidagi “Ishchi guruh”ning oʻrganish ishlarida konlarda amalga oshirilayotgan ayni holatni tahlil qilish, aniqlangan kamchiliklarni joyida bartaraf etish orqali neft va gaz qazib chiqarish hajmini oshirish koʻzda tutilgan.
Nazorat tadbirining ikkinchi kunida Boshqaruv raisi boshchiligidagi “Ishchi guruh” Muborak neft va gaz qazib chiqarish boshqarmasiga qarashli 10 ga yaqin kondagi quduqlar faoliyati bilan tanishildi.
“Ishchi guruh”i ayni paytda burgʻilash jarayonlari ketayotgan “Zevarda” konidagi 335, 336, 321-sonli ishlatish quduqlarini borib oʻrgandi. Bu yerda burgʻilash tashkiloti va Muborak neft va gaz qazib chiqarish boshqarmasi rahbariyati bilan burgʻilash ishlarining belgilangan reja boʻyicha bajarilishi tahlil qilindi. Boshqaruv raisi tomonidan burgʻilashni jadallashtirish uchun zarur boʻlgan moddiy-texnik resurslarni oʻz vaqtida yetkazib berish kabi muammoli masalalarni hal etish boʻyicha topshiriqlar berildi.
Ayni paytda gaz qazib chiqarishni koʻpaytirish maqsadida “Janubiy Kemachi” konidagi mavjud gaz quduqlar majmuasida yonlama oʻzanni burgʻilash bilan quduqlarni murakkab taʼmirlash ishlari olib borilmoqda. 2023-yilda ushbu kondagi 13 ta quduqda shu turdagi ishlarni amalga oshirish belgilangan boʻlib, hozirda 1, 2, 24, 64 va 144-sonli quduqlarda murakkab taʼmirlash ishlari olib borilmoqda. Oʻrganish jarayonlarida taʼmirlash ishlari uchun jalb qilingan maxsus texnika vositalari va ularning imkoniyatlari muhokama qilindi. Boshqaruv raisi masʼul departament boshliqlariga mazkur quduqlardan olinadigan natijalarning samarasi asosida ushbu yoʻnalishdagi tadbirlarni keng tatbiq etish masalasini oʻrganish boʻyicha koʻrsatmalar berdi.
Maʼlumot uchun qayd etish joizki, murakkab turdagi taʼmirlash ishlari olib borilayotgan ushbu quduqlarni burgʻilashga dunyoning ilgʻor kompaniyalaridan biri boʻlgan “Yantai Jereh Petroleum Equipment & Technologiyes Co. LTD” korxonasining zamonaviy qurilmalari bilan jihozlangan “ZJ-20” va “ZJ-30” burgʻilash dastgohlari jalb qilingan. Quduqlarni yoʻnalishli va gorizontal qismlarini burgʻilash hamda texnologik nazorat qilish xizmatlari Xitoyning “Karamay jiane energy Co.Ltd” kompaniyasining yuqori malakali mutaxassislari tomonidan zamonaviy texnologiyalari asosida amalga oshirilmoqda.
“Ishchi guruh” Muborak hududida uglevodorodlar zaxiralarini oshirish Dasturi doirasida 2022-yilda ochilgan yangi maydonlarda olib borilayotgan ishlar holatini nazorat qilish maqsadida “Tegirmon” guruhi konlarini koʻzdan kechirdi. Dastlab “Tegirmon” konidagi 6, 14, 17-sonli, “Gʻarbiy Tegirmon” konidagi 12-sonli ishlatish quduqlarini burgʻilash ishlari oʻrganildi. Shuningdek, “Yangi Olot” maydonidagi 4-, 5- sonli va “Oltinkoʻl” istiqbolli maydonidagi 1-sonli ishlov-qidiruv quduqlarida olib borilayotgan burgʻilash jarayonlari bilan tanishildi.
Boshqaruv raisi tomonidan “Yangi Olot” konining istiqbollarini baholash maqsadida 10-OE-sonli ishlatish qudugʻini burgʻilash joyi belgilandi. Quduqlar oʻrnini belgilashda Modellashtirish markazi tomonidan amalga oshirilgan ishlar hisoboti tinglandi. Masʼullarga quduqqa burgʻilash dastgohini oʻrnatish va burgʻilash ishlarini boshlashga ruxsat berildi.
Boshqaruv raisi “Yangi Olot” konidagi ishlarni jadallashtirish maqsadida kon boshliqlari, burgʻilash va kapital taʼmirlash ustalari bilan suhbatlashib, ular tomonidan bildirilgan oʻrinli taklif va mulohazalar boʻyicha masʼullarga topshiriqlar berdi.
Eslatib oʻtamiz, Muborak neft va gaz qazib chiqarish boshqarmasi tomonidan 2022-yilda 34 ta gaz konidagi 619 ta ishlatish quduqlaridan 14,7 mlrd kub metr tabiiy gaz qazib chiqarishga erishilgan edi. Konlardan qazib olingan gaz 15 ta gazni dastlabki va komleks tayyorlash qurilmalarida birlamchi tayyorlanib, 16 ta Siquv kompressor stansiyalarida bosimi oshirilib qayta ishlash uchun Muborak gazni qayta ishlash zavodiga uzatildi.
2023-yilda Muborak neft va gaz qazib chqarish boshqarmasida geologik texnik tadbirlar doirasida 26 ta quduqni burgʻilash (shundan 16 tasi izlov-qidiruv qudugʻi), 245 ta quduqni kapital taʼmirlash va intensifikatsiya qilish hamda 8 ta texnologik obyektni ishga tushirish rejalashtirilgan. Buning natijada 1 630,6 mln kub metr tabiiy gaz va 14,3 ming tonna suyuq uglevodorodlar qazib chiqarishga erishiladi.
“Oʻzbekneftgaz” AJ Matbuot xizmati
Izoh (0)