AQSHni ixtiyoriy tark etayotgan noqonuniy migrantlar uchun ilk charter reysi tashkil etildi. Ularga vataniga qaytish uchun bepul aviachipta berilgan, shuningdek, 1000 dollardan pul taqdim etiladi. Bu haqda AQSH Ichki ishlar vazirligi xabar berdi.
O‘zini deportatsiya qilganlar jami 65 kishi bo‘lib, Gonduras va Kolumbiya fuqarolari hisoblanadi. Ular vataniga ixtiyoriy qaytishi uchun CBP Home ilovasida ro‘yxatdan o‘tgan. Noqonuniy migrantlar 19-may kuni Xyustondan parvoz qilgan. Gondurasga qaytgan 38 kishiga mahalliy hokimiyat tomonidan qo‘shimcha tarzda 100 dollardan berilgan. Oziq-ovqat uchun talonlar taqdim etilgan va ish topishda yordam berish va’da qilingan.
Kolumbiyaga qaytgan 26 kishiga ham ijtimoiy xizmatlar ko‘rsatilgan. AQSH ichki ishlar vaziri Kristi Noem mamlakarda qolayotgan noqonuniy muhojirlarni ixtiyoriy deportatsiyani amalga oshirishga chaqirgan. Aks holda ular “jarimaga tortiladi, hibsga olinadi, deportatsiya qilinadi va hech qachon AQSH qaytishga ruxsat berilmaydi”, degan u.
Amerikaning CNN telekanali Gonduras rasmiylaridan iqtibos keltirib, u yerga qaytganlarning yarmi bolalar ekanini ma’lum qildi. Ularning kamida to‘rt nafari AQSHda tug‘ilgan va Amerika fuqarolari hisoblanadi. Ular oilasi bilan qolish uchun o‘z vatanlarini tark etgan.
“O‘zini deportatsiya qilish” yo‘li
Buni amalga oshirmoqchi bo‘lgan noqonuniy migrantlar CBP Home ilovasi orqali deportatsiyani tashkillashtiradi. Ularning vataniga qaytgani tasdiqlangach, 1000 dollar taqdim etiladi.
Hozirda noqonuniy muhojirni hibsga olish, ushlash va chiqarib yuborishning o‘rtacha qiymati AQSH uchun 17 ming dollarni tashkil etadi. Shu sababli “o‘zini deportatsiya qilish” muqobil va hamyonbop variant hisoblanadi. AQSHdan mustaqil deportatsiya qilishni istaydiganlar hibsga olinmaydi. Bundan tashqari, ular kelajakda Qo‘shma Shtatlarga qonuniy asosda kirish imkoniyatini saqlab qoladi. Tegishli tashabbus prezident Donald Tramp tomonidan ilgari surilgan.
Izoh (0)