АҚШни ихтиёрий тарк этаётган ноқонуний мигрантлар учун илк чартер рейси ташкил этилди. Уларга ватанига қайтиш учун бепул авиачипта берилган, шунингдек, 1000 доллардан пул тақдим этилади. Бу ҳақда АҚШ Ички ишлар вазирлиги хабар берди.
Ўзини депортация қилганлар жами 65 киши бўлиб, Гондурас ва Колумбия фуқаролари ҳисобланади. Улар ватанига ихтиёрий қайтиши учун CBP Home иловасида рўйхатдан ўтган. Ноқонуний мигрантлар 19 май куни Хюстондан парвоз қилган. Гондурасга қайтган 38 кишига маҳаллий ҳокимият томонидан қўшимча тарзда 100 доллардан берилган. Озиқ-овқат учун талонлар тақдим этилган ва иш топишда ёрдам бериш ваъда қилинган.
Колумбияга қайтган 26 кишига ҳам ижтимоий хизматлар кўрсатилган. АҚШ ички ишлар вазири Кристи Ноэм мамлакарда қолаётган ноқонуний муҳожирларни ихтиёрий депортацияни амалга оширишга чақирган. Акс ҳолда улар “жаримага тортилади, ҳибсга олинади, депортация қилинади ва ҳеч қачон АҚШ қайтишга рухсат берилмайди”, деган у.
Американинг CNN телеканали Гондурас расмийларидан иқтибос келтириб, у ерга қайтганларнинг ярми болалар эканини маълум қилди. Уларнинг камида тўрт нафари АҚШда туғилган ва Америка фуқаролари ҳисобланади. Улар оиласи билан қолиш учун ўз ватанларини тарк этган.
“Ўзини депортация қилиш” йўли
Буни амалга оширмоқчи бўлган ноқонуний мигрантлар CBP Home иловаси орқали депортацияни ташкиллаштиради. Уларнинг ватанига қайтгани тасдиқлангач, 1000 доллар тақдим этилади.
Ҳозирда ноқонуний муҳожирни ҳибсга олиш, ушлаш ва чиқариб юборишнинг ўртача қиймати АҚШ учун 17 минг долларни ташкил этади. Шу сабабли “ўзини депортация қилиш” муқобил ва ҳамёнбоп вариант ҳисобланади. АҚШдан мустақил депортация қилишни истайдиганлар ҳибсга олинмайди. Бундан ташқари, улар келажакда Қўшма Штатларга қонуний асосда кириш имкониятини сақлаб қолади. Тегишли ташаббус президент Дональд Трамп томонидан илгари сурилган.
Изоҳ (0)