Liberal demokratiyalar AQSH prezidenti Donald Trampning avtoritar intilishlariga birgalikda qarshi turish uchun “yetti demokratiya” — D7 klubini tuzishi lozim. Bu haqda NATO sobiq bosh kotibi Anders Fog Rasmussen Inews portaliga bergan intervyusida aytib o‘tdi.
Rasmussen ushbu klubga Buyuk Britaniya, Yevropa Ittifoqi, Kanada, Avstraliya, Yaponiya, Janubiy Koreya va Yangi Zelandiyaning qo‘shilishini taklif qilmoqda.
NATO sobiq bosh kotibining so‘zlariga ko‘ra, D7 a’zolaridan biriga iqtisodiy bosim o‘tkazilishini barchamizga qarshi hujum deb baholash va bu tahdidga jamoaviy tarzda javob berish lozim.
“Agar bizga Xitoy yoki AQSH tomonidan — bojxona tariflari yoki boshqa vositalar orqali bosim o‘tkazilsa, biz bir-birimizga yordam berishimiz shart”, deya ta’kidladi Rasmussen.
Rasmusenning ta’kidlashicha, ushbu guruh mamlakatlari jahon iqtisodiyotining 30-40 foizini tashkil etadi. Bu esa jiddiy kuchdir.
“Tramp butun dunyoga qarshi savdo urushini e’lon qildi, shuning uchun biz munosib javob topishimiz kerak… Ular o‘zlarining “Amerika birinchi navbatda”, degan millatchilik siyosati uchun haq to‘lashini ko‘rsatish uchun”, deya aniqlik kiritdi Rasmussen.
Bundan oldin NATO sobiq bosh kotibi Yevropa AQSHning yangi ma’muriyatining alyansga nisbatan dushmanlik siyosati fonida o‘z yolg‘izligiga ko‘nikishi kerakligini aytgan edi.
Shuningdek, u Trampni butun dunyoga qarshi savdo urushini boshlashda aybladi. Bundan tashqari, Rasmussenning fikricha, AQSH prezidenti “avtokrat xususiyatlarini” namoyon etmoqda.
Bundan oldin Tramp Yevropa Ittifoqi ko‘pincha AQSHga Xitoyga qaraganda yomonroq munosabatda bo‘lishini ta’kidlagan edi. U ittifoqni yoqimsiz deb atab, Yevropa Ittifoqining yon berishini va AQSHdan import qilinadigan mahsulotlarga qo‘yilgan to‘siqlarni pasaytirishini bashorat qildi.
Izoh (0)