Amerikaliklarning yarmidan ko‘pi, jumladan, har to‘rtinchi respublikachi prezident Donald Trampni Rossiya bilan juda yaqin aloqada deb hisoblaydi. Buni Reuters/Ipsos tomonidan o‘tkazilgan so‘rov natijalari ko‘rsatmoqda.
Ikki kun davom etgan so‘rov natijalariga ko‘ra, respondentlarning 56 foizi nazdida Tramp Moskva bilan haddan tashqari yaqin munosabatga kirishmoqda. Mazkur qarashni demokratlarning 89 foizi, respublikachilarning esa 27 foizi qo‘llab-quvvatlagan. 40 foiz respondentlar Oq uy rahbarining Rossiya bilan munosabatlari borasidagi xavotirlarni rad etgan. Yana 4 foizi esa javob bermagan.
G‘arbning kollektiv institutlari jiddiy sinovdan o‘tmoqda
Tramp ikkinchi prezidentlik muddatini boshlaganidan beri AQSH tashqi siyosatini keskin o‘zgartirdi. Jumladan, Vladimir Zelenskiyni Rossiya bilan tinchlikka intilmayotganlikda ayblab, ochiq tanqid qildi. Shuningdek, Kiyevni muzokaralarga majburlash uchun harbiy yordam va razvedka ma’lumotlari almashinuvini to‘xtatib qo‘ydi.
Trampning Rossiyaga bilan iliq munosabatlari, o‘z navbatida, Yevropa poytaxtlarini tashvishga solmoqda. Bu NATO a’zolarini Vashingtonga bog‘liqlikni kamaytirib, o‘z xavfsizligi haqida mustaqil qayg‘urishga undamoqda.
Reuters/Ipsos so‘rovi shuningdek, aksar amerikaliklar Trampning Ukrainaga yordam berish bo‘yicha “o‘ziga xos” yondashuvini qo‘llab-quvvatlayotganini ko‘rsatdi. So‘ralganlarning 44 foizi AQSH Kiyevni qo‘llab-quvvatlash evaziga uning mineral resurslaridan ulush olishi kerak, degan fikrni ma’qullagan. Ushbu g‘oyani respublikachilarning uchdan ikki qismi, demokratlarning esa beshdan biri yoqlab chiqqan.
Trampning hududiy ekspansiya rejalari hammaga ham ma'qul emas
So‘rov natijalariga ko‘ra, amerikaliklar Trampning AQSH hududini kengaytirish bo‘yicha rejalarini ma'qullamaydi. Oq uy rahbari Grenlandiyani sotib olish, Kanadani 51-shtatga aylantirish, Panama kanalini nazoratga olish, G‘azoga ega chiqish haqida bir necha bor gapirgan. So‘rov ishtirokchilari uning bu bayonotlarini jiddiy qabul qilmagan.
Izoh (0)