Либерал демократиялар АҚШ президенти Дональд Трампнинг авторитар интилишларига биргаликда қарши туриш учун “етти демократия” — Д7 клубини тузиши лозим. Бу ҳақда НАТО собиқ бош котиби Андерс Фог Расмуссен Innews порталига берган интервьюсида айтиб ўтди.
Расмуссен ушбу клубга Буюк Британия, Европа Иттифоқи, Канада, Австралия, Япония, Жанубий Корея ва Янги Зеландиянинг қўшилишини таклиф қилмоқда.
НАТО собиқ бош котибининг сўзларига кўра, D7 аъзоларидан бирига иқтисодий босим ўтказилишини барчамизга қарши ҳужум деб баҳолаш ва бу таҳдидга жамоавий тарзда жавоб бериш лозим.
“Агар бизга Хитой ёки АҚШ томонидан — божхона тарифлари ёки бошқа воситалар орқали босим ўтказилса, биз бир-биримизга ёрдам беришимиз шарт”, дея таъкидлади Расмуссен.
Расмусеннинг таъкидлашича, ушбу гуруҳ мамлакатлари жаҳон иқтисодиётининг 30-40 фоизини ташкил этади. Бу эса жиддий кучдир.
“Трамп бутун дунёга қарши савдо урушини эълон қилди, шунинг учун биз муносиб жавоб топишимиз керак… Улар ўзларининг “Америка биринчи навбатда”, деган миллатчилик сиёсати учун ҳақ тўлашини кўрсатиш учун”, дея аниқлик киритди Расмуссен.
Бундан олдин НАТО собиқ бош котиби Европа АҚШнинг янги маъмуриятининг альянсга нисбатан душманлик сиёсати фонида ўз ёлғизлигига кўникиши кераклигини айтган эди.
Шунингдек, у Трампни бутун дунёга қарши савдо урушини бошлашда айблади. Бундан ташқари, Расмуссеннинг фикрича, АҚШ президенти “автократ хусусиятларини” намоён этмоқда.
Бундан олдин Трамп Европа Иттифоқи кўпинча АҚШга Хитойга қараганда ёмонроқ муносабатда бўлишини таъкидлаган эди. У иттифоқни ёқимсиз деб атаб, Европа Иттифоқининг ён беришини ва АҚШдан импорт қилинадиган маҳсулотларга қўйилган тўсиқларни пасайтиришини башорат қилди.
Изоҳ (0)