Turkiya hukumati AQSH prezidenti Donald Trampning 15-may payshanba kuni Ukraina inqirozini tinch yo‘l bilan hal etish bo‘yicha muzokaralarda qatnashish uchun tashrif buyurishini kutmayapti. Bu haqda Bloomberg agentligi ma’lum qilgan.
Shu bilan birga, Turkiya hukumati Amerika rahbarining yaqin kunlarda, ayniqsa Rossiya prezidenti Vladimir Putin Turkiyaga kelsa, Istanbulga tashrif buyurishini ham istisno etmayapti.
Ilgari Tramp Turkiyaga safar qilish g‘oyasini o‘ylab ko‘rishini aytgan, ammo Yaqin Sharqqa safari jadvali juda zich ekanligini ta’kidlagan edi.
Rossiya prezidenti Vladimir Putin 15-may kuni Istanbulda Ukraina bilan to‘g‘ridan to‘g‘ri muzokaralarni boshlashni taklif qilgandi. Ukraina prezidenti Vladimir Zelenskiy mazkur muzokaralarda Putinni shaxsan kutishini aytdi.
AQSH prezidenti Donald Tramp Rossiya va Ukraina vakillari o‘rtasida uchrashuvlar bo‘lib o‘tishi mumkin bo‘lgan Istanbulga tashrif buyurish imkoniyatini ko‘rib chiqayotganini ma’lum qildi.
AQSHning Ukrainadagi maxsus vakili Kit Kellog agar Rossiya prezidenti Vladimir Putin 15-may kuni Turkiyaga Rossiya va Ukraina o‘rtasidagi uchrashuvga kelsa AQSH prezidenti Donald Tramp ham Istanbulga borishi mumkinligini bildirdi.
Rossiya prezidenti yordamchisi Yuriy Ushakovning aytishicha, Rossiya bosh konsulligi va Turkiya hukumati ehtimoliy Rossiya—Ukraina muzokaralari o‘tkaziladigan joyni tashkil etish ustida ishlamoqda.
AQSH prezidenti Donald Tramp yaqin kunlarda Ukrainadagi mojaroni hal etish masalasida yaxshi yangiliklar kutilayotganini ma’lum qildi.
Izoh (0)