Meksika Google’ni Meksika ko‘rfazini “Amerika ko‘rfazi” deb qayta nomlagani uchun sudga berdi. Mamlakat 2025-yil yanvar oyida hudud nomini o‘zgartirmaslik to‘g‘risida takroriy ogohlantirishlar yuborgan, ammo bu so‘rovlar e’tiborsiz qoldirilgan. Bu haqda BBC xabar berdi.
Meksika prezidenti Klaudiya Sheynbaum da’vo qayerga berilganini oshkor qilmagan. 9-may kuni respublikachilar boshchiligidagi AQSH Vakillar palatasi ko‘rfazni federal idoralar uchun rasman qayta nomlashga ovoz bergan.
AQSH prezidenti Donald Tramp yanvar oyida ko‘rfaz nomi “u yerdagi ishlarning katta qismini AQSH bajargani sababli” o‘zgartirilayotganini aytgandi.
Sheynbaum hukumati Trampning qarori faqat kontinentning AQSH qismida amal qilishini aytgan. Shuningdek, AQSH butun ko‘rfazni qayta nomlash vakolatiga ega emasligi ta’kidlangan.
Klaudiya 2025-yil yanvar oyida Google’ga xat yozib, undan Meksika ko‘rfazini AQSH foydalanuvchilari uchun qayta nomlash qarorini qayta ko‘rib chiqishni so‘ragan.
Google bunga javoban rasmiy hukumat manbalari joy nomlarini yangilasa, kompaniya ham shunga asoslanib ish tutishini ma’lum qilgandi. Unda aytilishicha, AQSH, Kuba va Meksika bilan chegaradosh ko‘rfaz meksikalik ilova foydalanuvchilari uchun o‘zgartirilmaydi. Dunyoning boshqa joylaridagi foydalanuvchilar esa “Meksika ko‘rfazi (Amerika ko‘rfazi)” deb nomlangan yorliqni ko‘rishadi.
AQSH prezidenti Donald Trampning Saudiya Arabistoniga bo‘lajak tashrifi chog‘ida Qo‘shma Shtatlar bundan buyon Fors ko‘rfazini “Arab ko‘rfazi” deb atashini ma’lum qilgandi.
Eron tashqi ishlar vaziri Abbos Araqchi bunga javoban “bema’ni mish-mishlar, ma’lumotni noto‘g‘ri talqin qilishdan boshqa hech narsa emas” va “bunday harakat barcha eronliklarning g‘azabini keltirishini” aytgan.
Izoh (0)