O‘zbekistonda bojxona rasmiylashtiruvidan o‘tishda gibrid avtomobillar uchun majburiy ekologik sertifikatlash talabi bekor qilindi. Bu haqda Senatning 28-may kuni bo‘lib o‘tgan yalpi majlisida ma’lum bo‘ldi.
Mamlakatga olib kirilayotgan gibrid avtomobillarni bojxonada rasmiylashtirish jarayonida “Yevro-4” ekologik toifasidan kam emasligini tasdiqlovchi ekologik sertifikat (narxi taxminan 2 mln so‘m) talab etilayotgani jamoatchilikda keng muhokamalarga sabab bo‘lgandi. Vaholanki, ushbu transport vositalari “Yevro-5” yoki “Yevro-6” ekologik standartlariga javob beradigan elektrodvigatellar bilan jihozlangan holda olib kirilmoqda.
May oyining boshlarida gibrid avtomobillarni ekologik sertifikatlash tartibi yuzasidan senator so‘rovi yuborildi.
Unda quyidagilar bo‘yicha tushuntirish berish so‘ralgan:
- respublikada faoliyat olib borayotgan ekologik sertifikatlash organining tashkiliy-huquqiy asoslari, faoliyatini tartibga solish tartib-taomillari;
- avtomobillarni ekologik standartdan o‘tkazuvchi akkreditatsiyadan o‘tgan sinov laboratoriyalari, ularning moddiy-texnik bazasi, avtomobillarni sinovdan o‘tkazish qamrovi va imkoniyatlari;
- elektrodvigatellar bilan jihozlangan gibrid avtomobillarni rasmiylashtirish jarayonida ekologik sertifikat olish to‘g‘risidagi talabning meʼyoriy-huquqiy asoslari;
- arizani ko‘rib chiqish, ekologik sertifikatlash jarayonini amalga oshirish va ekologik sertifikat berish yoki uni berishni rad etish yuzasidan ishlar qiymati bo‘yicha belgilangan to‘lov miqdori masalalariga aniqlik kiritish.
28-maydagi yalpi majlisda Senat a’zosi vazirlikning senator so‘roviga javobida ayrim ma’lumotlar tushib qolgani, ularga aniqlik kiritilmagani, bu tufayli senatorlar odamlarga masala yuzasidan aniq javob berolmaganini aytdi. U majlisda ishtirok etayotgan Ekologiya vazirligi va Bojxona qo‘mitasi mas’ullaridan hozirgi kunda gibrid avtomobillarni mamlakatga import qilishda ekologik sertifikat talab qilinayotgani yoki yo‘qligi haqidagi savolga aniq javob berishni so‘radi.
Ekologiya vaziri birinchi o‘rinbosari Obidjon Qudratov bunga javoban amaldagi qonunchilikka ko‘ra, gaz, benzin va dizelda yuradigan mashinalardan ekologik sertifikat so‘ralishi, lekin elektromobillar bundan ozod qilinganini bildirdi. Gibrid mashinalar haqida esa aniq norma yo‘qligi sababli tushunmovchilik kelib chiqqan va sertifikat talab qilingan.
Hozirda buni aniq belgilab qo‘yish maqsadida Vazirlar Mahkamasi qarori loyihasi ishlab chiqilgan va u vazirlik hamda idoralar bilan kelishilganini, qisqa muddatda Adliya vazirligidan huquqiy ekspertizadan o‘tkazilib, Vazirlar Mahkamasiga kiritilishini aytdi. Ayni vaqtda mamlakatga olib kirilayotgan gibrid avtomobillardan ekologik sertifikat talab qilinmayotganini bildirdi.
Tanzila Norboyeva bungacha mazkur sertifikat bo‘yicha odamlardan to‘lov undirilganini ta’kidlab, vazir o‘rinbosariga bu qanchalik to‘g‘ri yoki noto‘g‘riligini so‘radi.
“Sertifikatlash bugungi kunda umuman talab etilmayapti. Bu masala ko‘tarilganda biz tegishli aniqlik kiritib, ko‘rsatmalar berdik. Bojxona qo‘mitasi bilan kelishib olindi. To‘lov undirilmasligi kerak”, dedi Obidjon Qudratov.
Lekin hozirgi kungacha bunday sertifikat nechta avtomobilga rasmiylashtirilgani va qancha to‘lov undirilgani, pullar ularning egalariga qaytarish-qaytarilmasligiga aniqlik kiritilmadi.
Izoh (0)