Avvalroq O‘zbekistonda Leapmotor yengil avtomobillarini sertifikatlash vaqtincha to‘xtatilgani haqida xabar berilgandi. Texnik jihatdan tartibga solish sohasida nazorat inspeksiyasi matbuot xizmati ushbu holat bo‘yicha qo‘shimcha maʼlumot berdi.
Qayd etilishicha, ushbu masala yuzasidan 7-aprelda Gu Jiven boshchiligidagi Zhejiang Leapmotor Technology Co. LTD kompaniyasi “O‘zTest” DMga tashrif buyurdi.
Natijada, kompaniya tomonidan Leapmotor‘ning C16 rusumli 2 ta avtomashina O‘zbekistonga import qilindi. Mashinalar 14-aprel kuni Piskent tumanida joylashgan sinov laboratoriyasida BMTning 10-son qoidalarida belgilangan tartibda qayta sinovlardan o‘tkazildi.
O‘tkazilgan takroriy sinovlar yakunida avtomashina BMTning 10-son qoida talablariga muvofiq topildi. Leapmotor kompaniyasiga shartli ravishda mazkur tovar belgili mashinalarni respublikada muomalaga chiqarilishiga ruxsat berildi. Shartlar quyidagilardan iborat:
- Leapmotor avtomashinalarining nomuvofiqligi aniqlanganda ularni bartaraf qiluvchi hamda isteʼmolchiga yetkazilgan zararni qoplovchi ishlab chiqaruvchining rasmiy vakili – O‘zbekistonda rezident hisoblangan yuridik shaxsni belgilash;
- Respublikaga import qilinayotgan Leapmotor avtomashinalarining turini maʼqullash uchun zarur bo‘lgan tegishli hujjatlarni taqdim qilish;
- Leapmotor avtomashinalari ishlab chiqarilayotgan korxonalarda ishlab chiqarish jarayonlari va shartlarini o‘rganish va baholash.
Texnik jihatdan tartibga solish sohasida nazorat inspeksiyasi matbuot xizmati, avvalroq, Xitoyning Leapmotor kompaniyasiga tegishli C16 rusumli avtomobili xalqaro standartlarga, xususan, BMT tomonidan belgilangan xavfsizlik talablariga javob bermasligi haqida xabar bergandi.
O‘zbekistonda oxirgi paytlarda elektromobillar importi keskin qisqarmoqda. Masalan, 2025-yil yanvar—fevral oylarida mamlakatga elektromobillar importi sezilarli kamaydi. Ikki oy davomida jami 17 million 967 ming dollarlik 1555 dona elektromobil olib kirilgan. 2024-yil yanvar—fevral oylarida esa 85 million 415 ming dollarlik 3489 dona elektromobil import qilingandi.
Iqtisodchilar fikricha, import qisqarishiga Toshkent viloyati Piskent tumanidagi chet eldan keltirilgan avtomobillar uchun sinov poligoni ishga tushgani taʼsir qilgan bo‘lishi mumkin. Poligon quvvati O‘zbekistonga avvalgidek ko‘p avtomobil kiritish uchun yetarli emas. Bu tabiiy ravishda import jarayonini murakkablashtiradi, oqibatda avtomobillar narxi qimmatlashadi.
2024-yil 1-noyabrdan O‘zbekistonga import qilinadigan transport vositalari Piskent poligonida sinovdan o‘tkazila boshlangan. Bunga sabab sifatida harakat xavfsizligini kuchaytirish va mamlakatga olib kirilayotgan transport vositalari sifatini yaxshilash maqsad qilingani bildirilgan.
Mart oyi yakunida Texnik jihatdan tartibga solish agentligi tomonidan Xitoyning Leapmotor C16 avtomobilida “kamchilik” aniqlangani maʼlum qilindi. Agentlik mashinalarni sertifikatlash organlariga ogohlantirish xati yuborib, Leapmotor kompaniyasining barcha avtomobillari importiga taqiq qo‘yilganini bildirdi.
Avvalroq BYD Uzbekistan Factory qo‘shma korxonasi hukumatdan elektromobillarning tartibsiz importini cheklashni so‘ragandi. O‘shanda jamoatchilik faollari importni cheklash raqobat yo‘qolishiga olib kelishidan xavotir bildirgan. Ayrim iqtisodchilar fikricha, O‘zbekistonda yangi avtomobil zavodlari ochilishi avtomashinalar narxi pasayishiga olib kelmaydi.
Izoh (0)