AQSH prezidenti Donald Tramp ma’muriyatining xarajatlarni va davlat apparati sonini qisqartirish bo‘yicha sa’y-harakatlariga qaramay, joriy moliyaviy yil boshidan beri AQSH byudjeti taqchilligi 196 milliard dollarga oshgan. Bu haqda Kongress byudjet boshqarmasi (CBO) hisobotida ma’lum qilindi.
Hisobotga ko‘ra, oktyabr-aprel oylari davomida federal xarajatlar o‘tgan yilning shu davriga nisbatan 342 milliard dollarga ko‘paygan. Asosiy o‘sish mudofaa, immigratsiya dasturlari va ijtimoiy majburiyatlarga to‘g‘ri kelgan. Daromad solig‘i yig‘imi yuqori bo‘lishiga qaramay, shu davr mobaynida byudjet daromadlari atigi 146 milliard dollarga oshgan.
“Mudofaa va immigratsiya xarajatlari, shuningdek, ijtimoiy ta’minot va sog‘liqni saqlash tizimlariga davom etayotgan bosim joriy moliyaviy yil boshidan beri byudjet taqchilligini 196 milliard dollarga oshirdi”, deyiladi Kongress boshqarmasi hisobotida.
Ta’kidlanishicha, mudofaa xarajatlari 39 milliard dollarga, Ichki xavfsizlik vazirligi xarajatlari esa 18 milliard dollarga oshgan. Taqchillikka eng katta hissani Social Security va Medicare dasturlari bo‘yicha to‘lovlar qo‘shgan. Ularning umumiy miqdori deyarli 1,5 trillion dollarga yetib, o‘tgan yilga nisbatan 70 milliard dollarga ko‘p bo‘lgan.
Ushbu ko‘rsatkichlar fonida Tramp ma’muriyati kamida 2 trillion dollarlik xarajatlarni qisqartirish rejalarini o‘z ichiga olgan soliq va immigratsiya bo‘yicha keng ko‘lamli qonun loyihasini qabul qilishga harakat qilmoqda.
Tramp qarori bilan tashkil etilgan AQSH Davlat samaradorligi departamenti (DOGE) “behuda sarf-xarajatlarni kamaytirish va federal agentliklarni qayta tashkil etish” maqsadida tuzilgan.
Qo‘shma Shtatlar moliya vaziri Skott Bessent 16-yanvarda Amerika hukumatining federal xarajatlari tinchlik davrida misli ko‘rilmagan darajaga yetganini va byudjet taqchilligi YIMning 6,8-7 foizini tashkil etayotganini ma’lum qildi. U Amerika moliyaviy siyosatining hozirgi holatini “nazoratdan chiqib ketgan” deb baholab, ehtimoliy oqibatlardan tashvishlanayotganini bildirdi.
Bundan tashqari, AQSH Kongressi Vakillar palatasi spikeri Mayk Jonson 11-fevralda DOGE AQSH hukumatining Kongressdan ruxsat olinmagan “hayratlanarli” xarajatlarini aniqlagan, deb aytgandi.
Izoh (0)