Amerika Qo‘shma Shtatlari prezidenti Donald Tramp AQSHning Jahon sog‘liqni saqlash tashkiloti (JSST)dan chiqishini e’lon qildi.
Tramp o‘z inauguratsiyasidan so‘ng imzolagan dastlabki rasmiy hujjatlardan biri Qo‘shma Shtatlarning JSSTdan chiqishi to‘g‘risidagi farmon bo‘ldi. U tashkilotning 2020-yilda Uxanda (Xitoy) yuzaga kelgan COVID-19 pandemiyasi, shuningdek, sog‘liqni saqlash sohasidagi boshqa global inqirozlar paytidagi samarasiz harakatlariga ishora qildi.
Farmonda “JSST zudlik bilan zaruriy islohotlarni o‘tkazishga va tashkilotga a’zo davlatlarining noo‘rin siyosiy ta’siridan mustaqilligini namoyish etishga qodir emasligi” haqida so‘z boradi. Trampning ta’kidlashicha, bundan tashqari, JSST Qo‘shma Shtatlardan boshqa mamlakatlar to‘lovlaridan sezilarli darajada yuqori bo‘lgan adolatsiz badal to‘lovlarini talab qilishni davom ettirmoqda.
Aholisi 1,4 milliard kishini tashkil etadigan Xitoyning aholisi AQSH aholisidan uch baravar ko‘p, ammo u JSSTga deyarli 90 foiz kamroq mablag‘ ajratadi, deydi Tramp.
Yangi farmonga ko‘ra, prezidentning milliy xavfsizlik masalalari bo‘yicha yordamchisi Milliy xavfsizlik kengashi doirasida jamoat salomatligini va biologik xavfsizlikni himoya qilish mexanizmlarini ishlab chiqishi lozim.
AQSH yetakchisi davlat kotibiga va Ma’muriy-byudjet boshqarmasi direktoriga hukumatning JSSTga har qanday mablag‘, qo‘llab-quvvatlash yoki resurslarini o‘tkazishni to‘xtatish uchun tegishli choralar ko‘rishni; JSST bilan ishlaydigan AQSH hukumati xodimlari yoki pudratchilarini chaqirib olish va qayta tayinlashni; shuningdek, ilgari JSST tomonidan bajarilgan zarur vazifalarni amalga oshirish uchun AQSHda va xorijda ishonchli hamda shaffof hamkorlarni aniqlashni topshirdi.
Tramp Oq uyning pandemiyaga tayyorgarlik ko‘rish va javob berish siyosati bo‘yicha direktoriga 2024-yilgi AQSH sog‘liqni saqlash sohasidagi global xavfsizlik strategiyasini imkon qadar tezroq qayta ko‘rib chiqish, bekor qilish va o‘zgartirish vazifasini yukladi.
Bundan tashqari, chiqish jarayoni davom etar ekan, davlat kotibiga JSSTning Pandemiya to‘g‘risidagi kelishuvi va Xalqaro tibbiy-sanitariya qoidalariga kiritilayotgan o‘zgartirishlar bo‘yicha muzokaralarni to‘xtatish topshirildi. Ushbu kelishuvlarni amalga oshirish bo‘yicha har qanday harakatlar Qo‘shma Shtatlar uchun majburiy kuchga ega bo‘lmasligi ta’kidlandi.
Prezident o‘z saylovoldi kampaniyasi davomida “sog‘liqni saqlashga qat’iy sodiq bo‘lishga, shuningdek, suverenitet va erkinlikni qo‘llab-quvvatlovchi davlatlarning yangi ittifoqini tuzish ustida ishlashga” va’da bergan edi.
CNN telekanaliga bergan intervyusida Bayden ma’muriyati davrida Oq uyning COVID-19ga javob berish bo‘yicha koordinatori lavozimida ishlagan doktor Ashish Ja Trampning JSSTdan chiqish qarorini “strategik xató” deb baholadi.
Jahon sog‘liqni saqlash tashkiloti juda muhim tashkilot hisoblanadi va Amerikaning undan chiqishi natijasida faqat bitta mamlakat, ya’ni Xitoy to‘ldira oladigan siyosiy bo‘shliq vujudga keladi, deydi u.
Izoh (0)